2010年1月31日 星期日

烹任班 -法國菜 - 第四堂

第三堂教牛柳露仙尼和牛油麵,不過唔記得帶相機,無影相。


星期六試煮了牛油麵,都幾成功


似唔似干炒牛河呀?



查氏父女話好好味,今次係攞阿 Sir 啲汁番來加料整,所以易整好多,如果下次用自己煮嘅汁整,有今次嘅水準,才算成功!



食譜:


配料:    乾麵五個 ( 四人份量)        雞肝 ( 兩、三個)     洋葱一個


             白菌一盒     王汁(阿Sir整嘅) 三、四湯匙       忌廉少許


做法:


1.    雞肝用紅酒浸過夜 ( 目的用來殺菌)


2.    煲滾水,放牛油將麵餅烚熟,約五分鐘


3.    雞肝切粒,洋葱切粒


4.    白菌切片,用牛油、乾葱蓉炒香白菌備用


5.    用牛油炒香洋葱、雞肝,加入白菌一起炒,加王汁,下調味( 鹽、糖、雞粉、古月粉),加入麵炒勻,加忌廉快手炒勻便成


 


 

2010年1月28日 星期四

換手機

我本身唔係一個追手機朝流嘅人,但唔知點解,大約一年左右,啲手機就會出現問題,要我換機。近幾年都沒有什麼款,一出我係會好鍾意,但呢一部,嘩!一出,我就勁鐘意,而且價錢都唔太貴 ( $1800 左右),於是叫查生送給我。


登....登...登.....登,我份生日禮物呀!



好 cute 架!勁似日本機,希望呢部會耐用啲啦!




 

2010年1月25日 星期一

對比

偶然發現了這幅相,攝於零四年三月,家姐五歲生日會。



六年後(一零年一月),肥仔嘅婚宴上,多咗肥 Milk,七個小朋友。



長大了,仍然係好朋友,唔知再過六年又如何呢?睇住啲小朋友一天、一天的長大,真係覺得啲時間過得好快,自己又老得好快!

2010年1月24日 星期日

又有婚宴



星期六,又去飲。呢一年裡( 09年至今) 真係飲咗好多餐,有兩次重係一家四口一齊去,雖然做人情做到手較,不過,朋友結婚,都鄧佢高興,加上成班 friends 一齊去,大人細路,都開開心心!


三母女,着靚靚去飲。



幾個小朋友又聚頭,今次加埋霖霖,七小福坐埋一圍,很難得嘅場面。



我地呢班朋友,最好就係女人 friend,男人又 friend,連啲細路都 friend,大人細路都啱哂 key!





班男人,成餐都掛住賭,



班細嘅就喺到玩。



雖然係去飲,但我地都當今餐係團年飯喇!不過大合照,喺新郎哥到,遲啲再補番。

2010年1月20日 星期三

烹任班 -法國菜 - 第三堂

西冷牛扒巴黎汁配風燈茨仔


 




每人分到一份,我唔食牛,所以攞咗番屋企比兩姊妹食



一人一塊,當下午茶



今日Trips:


煎牛扒要煎四邊先,所住啲肉汁。煎得好食嘅牛扒,唔可以只放在鑊煎到熟,只可煎到三成,再用焗爐,低面火(250 度)焗10 分鐘 ( 8 安士),塊牛扒就會啱啱好喇!

2010年1月18日 星期一

感恩

今日係一月十八日,剛剛行完畢業禮一個月。自從畢業禮後,影了很多相,但一路都無時間,將啲相整理,於是今日啲起心肝,執好啲相,預備去哂。


好想感謝主,因為係短短嘅一個月內,基本上大部份嘅朋友,都有同我影過相,一啲平時幾個月唔見嘅朋友或親戚,都可以一一係呢個月見面 ( 其實有啲唔係刻意安排,係O甘啱架),又一次証明,一切事情,皆有主嘅安排!


TI 同學




商科同學




中學同學 ( 平時半年先見一次架,好開心可以約到 )



小學同學 ( 呢兩個仲耐,成年都見唔到一次)



Eva



阿 May 和 Carrie




Kennis ( 好難先約到嘅朋友)



唔少得契爺、契媽



成日見嘅好朋友



就連一年只係見幾次嘅表姐、姨媽都約到




自己一家人,當然唔少得啦!



老爺、奶奶



感謝所有和我影過相嘅朋友、親戚和家人,一同分享我嘅喜悅!


 


 


 


 


 


 

2010年1月14日 星期四

第一次試煮法國菜

今日兩姊妹考完試,當係興祝一吓,就試煮上星期學嘅法國菜。不過,煮法國菜,真係比整中菜複習,整東、整西,都成個幾鐘,好彩有阿 Sir 嘅秘製玉汁喳! (要煮三個鐘架!)


雀肉釀雞胸拼厘梳厘茨仔



同阿 Sir 整嘅爭好遠,啲肉太'Hi" ( over cook 咗,醃又醃唔夠時間,係忘記咗之前醃定),麻麻地,雖然賣相唔得,但啲味都有五成架!



至於啲薯仔,似唔似阿 Sir 嗰啲呀? ...... 差唔多啦!


呢盆係我嘅



阿 Sir 嘅



其實,學煮嘢食,真係要試一次整,先有更清楚嘅概念,失敗唔緊要,最緊要錯誤中學習。


食譜:


雀肉釀雞胸


雞胸 4 件             肝醬兩罐


將雞胸斜切一刀,把肝醬切成片,放進已片開嘅雞胸。


用白胡椒粉,糖、鹽、雞粉、少許油及白蘭地酒,醃最少兩個鐘,但不可過八個   鐘)。


把雞胸先沾麫粉,再塗上雞蛋,用由煎至金黄色,再放進焗爐用低面火 200 度焗 10 分鐘至熟。


用油炒香肝醬,加入玉汁 (秘製),白蘭地拌勻,最後加入調味 ( 鹽、糖、白胡椒粉及雞粉),和少許牛油煮滾。


把煮滾嘅肝玉汁淋在雞胸上


厘梳厘茨仔 --- 蘇式茨


茨仔兩個          白麵包糠一包       番茜碎 ( Parsley)   


牛油清(用慢火煮溶解牛油)      蒜容    少許


將麵包糠、蒜容、番茜碎 、少許鹽、糖、雞粉,及適量牛油清逐少加入,撈混備用。


將茨仔去皮切片,用油炸至半熟,然後回鑊用少許牛油清再炒,加入已調味嘅包糠再炒混,放入焗爐焗約 5 分鐘便成。 ( 如茨仔是剛炸起,勻用面火(200度)焗,如果茨仔凍了,用鍚紙蓋面,低面火(200度) 焗熱,最後預兩分鐘,取開鍚紙,焗至面呈金黄色即可。


 

2010年1月13日 星期三

烹任班 -法國菜 - 第二堂

法國菜 嘅第二堂


燴鴨黑車厘子汁配厘梳厘茨仔,呢味都唔太難整,可以考慮試試。



呢盆咩嘢?



係好味嘅薯仔。



當然有得試食啦!重攞咗d 燒汁番來,睇吓聽日買唔買到材料整雞胸。



 

2010年1月12日 星期二

角力

每次一到考試、測驗的日子,就要跟兩姊妹角力,近年,每到温書嘅時間,就要跟妹妹角力一番,平時默書,多得去了補習社,由補習社嘅老師同佢温,總算避過一番的角力,但到了考試期間,難免又要閙過你死我活。


每次都係唔滿意佢嘅學習態度,一副唔想温,死蛇難善嘅樣,真係睇見都眼火爆!我寧願佢蠢,佢唔識唔緊要,但佢唔係唔識喎,只係無心裝,懶懶閒,你急佢唔急,鬧佢重要一言九鼎,唉!激死我喇! 


或者我真係無 EQ 啦!週旋喺兩姊妹之間,温習就變成一場可怕嘅角力戰爭了!

2010年1月11日 星期一

反常?

又話温室效應,全球暖化,點解北京會劇凍,英國又下大雪,真係反常嗎?雖然香港無兩年前果次     O甘涷,但今晚都凍咗,我係一個好鍾意凍嘅人,好鍾意落雪,可惜香港無啦,所以我好驚將來無冬天,就連少少凍嘅感覺都無埋,就慘喇!


 

2010年1月7日 星期四

覆診 Update - Jan 6, 2010

琴晚去覆診,我同醫生講呢個半月來情緒穩定,問佢幾時可以減藥,點知佢一口應,話試吓食少半粒。嘩!我個 2010 年大計,o甘快就可以實現,雖然都有啲擔心,但我有信心可以嘅。" 靠著那加給我力量的,凡事都能作"


感謝主!

烹任班 -法國菜 - 第一堂

烹任班第一堂,學咗兩道菜:


田螺湯, 呢個係阿 sir 整嘅



雀肉釀雞胸



嘩!法國菜連整個湯,都要成個半鐘,唔怪得要食幾個鐘啦!我地係無得煮嘅,只可以睇阿 sir 示範,不過就有得食。




試食完都飽哂,唔洗食 lunch ,於是同 Eva 去咗 Starbuck 食甜品、飲咖啡。完美嘅一頓午餐。