2013年3月25日 星期一

19940326

呢一堆數字好似好抽像,但對我來說就好有意思!1994年3月26日,我既人生改變了,十九年了!沒有什麼特別慶祝,平平凡凡食餐晩飯而已! 今次唔食西餐,選了九龍城津屋,食日本嘢!




刺身拼盆,啲海膽好新鮮!



 
呢度啲串燒,燒得好乾身,唔錯 燒三文魚皮,超脆!




其他既串燒都幾好,燒豆腐,個豆腐好脆,黑豚肉大蔥串,都好味!



 
焗蠔,超正!面頭個汁好正!encore 叫多客,咁多樣之中,最有水準!




食物水準大致唔錯,不過又唔會令人好難忘,除了個焗蠔呢!
 
簡簡單單一餐飯,都好滿足!

Afternoon Tea @洲際 Lobby lounge

朋友仔又放半日假,喜愛相約一齊食 tea 。

今次去了洲際酒店既 lobby lunge 食 tea set , 個 set 好靚!啲鹹點好好味!




呢度杯凍檸茶好特別,啲冰係用茶做,令到杯茶好有茶味!







舒舒服服 hea 幾粒鐘,好正!下午茶 set $548 for two加一, 𣿬豐白金咭85 折,即$256 一位,通常我地唔食 lunch 就來,之後又飽到唔洗食晚飯,所以呢餐 tea 都唔貴,一餐可當三餐食,哈哈!

P.S: 啲相係朋友仔影,影得好靚,多謝哂!

2013年3月21日 星期四

插花

近日愛上了插花,喜愛去花墟逛,買些花回家插,雖然我天生冇咩藝術細胞,冇咩美感,但簡簡單單插,都可以!




我覺得喺春天呢啲咁悶人既天氣,有啲花望下,心情好似好些!

2013年3月15日 星期五

第二次面試 - 妹妹篇

琴日先話望信箱,今日就收到伊中既信,可惜係拒絕信,冇得去面試。記得前年家姐考時,成績和妹妹而家差不多,佢都有面試機會,相信今年去考既學生成績一定比當年高了!算啦!有得見都實唔得,面試唔係妹妹強項,等大抽獎吧!

不過,明天有機會去家姐間中學 second in , 可能有機喎! Anyway , 唔洗再望天打掛地等信喇!


2013年3月14日 星期四

望信箱的日子-妹妹篇

之前家姐六年班時,已經寫過"望信箱的日子"呢篇網誌,原以為今次妹妹,應該冇咁緊張,點知上星期六,幾個同學仔,收到信話其中一間中學,有得 second in,而我地就收唔到,幾緊張呀!

好在星期一,終於收到喇!但是,還有另一間未收到通知,由於這間學校只 in 三份一報名者,所以冇信就表示冇機會喇!知道佢地下星期六,就係面試日,即是呢幾日到下星期初,冇信即是冇希望了!
 
所以,呢幾日唯有繼續望住個信箱啦!


2013年3月12日 星期二

無奈

琴晚睇電視劇 "心路GPS",其中一幕,講述一個母親,因仔女夾計扮孝順,其實一心想謀住佢層樓,結果比母親知道真相,母親傷心慾絕,一怒下買了層樓,分了啲錢比仔女,之後離家出走,但兩個親生仔女,不但冇去搵媽媽,還去慶祝計劃成功,最離譜係,仲要去追阿媽個養仔,取回阿媽分比佢既四十萬,重點係只有這個養子,係真心對佢阿媽,實在睇到人好嬲,但又的確好現實,有好多這些只看錢既仔女存在,唉!現今社會,太多看錢重於一切既人!



 
自問自己都不是一個十分孝順既女兒,話哂父母養大自己,供書教學,佢地年老,係好需要我地去照顧番,不過,自己而家有個家庭,好多時付出比自己家庭,一定多過父母,但我一定唔會唔理佢地!而家做了人阿媽,更加明白父母對仔女既付出,往往多於仔女為父母付出,大多都掉不到返轉頭,呢啲就係老豆養仔,仔養仔既道理!
 
起初我沒有追看這套電視劇,覚得這套劇沒太吸引,但近呢兩週開始,覚得套戲好反映現實,題材不是來來去去既爭家產,公司內既勾心鬥角之類,只係講下港孩、仔女和婆媳関係,好日常每個家庭,都會面對既問題,真實得很,反眏了好多人性醜陋一面,電視劇好少去得咁盡,不過這戲有口卑,但收視又不是太高,好似欠一點點似的,可能太多新人,太寫實有些似鏗鏘集,而且好似冇咩愛情缐,幾寫實既電視劇,好似都一定要有愛情線,之前既"老表,你好嘢",反映時事,去到後期,都要有幾條愛情缐,先可吸引觀眾,而呢套劇,只講親情,就略為欠一些了!

2013年3月11日 星期一

最後一次呈分試 - 妹妹篇

輕鬆了三個月,又到了最後一次既呈分試。話哂玩了三個月,我和妹妹,個心都散了!
 
其實,過埋今次考試,最艱難既日子,都過去喇!下次畢業試,會冇咁緊張,比佢自由發揮了!
 
如常地幫佢分析下啲題目,準備下啲補習練習比佢溫習,陪著佢溫習。




過埋餘下三個月,我就功成身退了!升了中學,功課溫習既事,都唔到我理喇!

2013年3月6日 星期三

戀愛季節

最近冇咩電視劇好追,兩套電視劇都好似唔太吸引,不過,有時點都會睇下,偶爾睇了8:30 嗰套"戀愛季節",其中一個單元,我覺得幾好睇,幾有意思!



呢個單元係講一個叫秋生既女仔,她好自我和任性,當時有兩個男人一齊追佢,結果因一些事件,她沒有選之前較心儀既一個,同了另一個男人拍拖、結婚,後來要面臨離婚,秋生幻想,如果時光可倒流,她和原先那個男人一齊,結局會否美滿些,突然所有事立即返回原點,重新來過,她同了之前心儀那個男人結婚,可惜最後亦因種種原因,還是離婚收場,於是秋生又想重新再來,去返選擇第一個既男人,不過今次,她的性格和做人既態度都改變了,雖然也敵不過離婚既宿命,但到最後,她可以和老公重修舊好,有個美滿既結局!

我相信如果生命中一些決定,可以重新選擇,好多人都想知,另一個結局會怎樣,是否一定較好,但劇中安排並非如此,無論她選邊一個,結果都是一樣!不過,去到最後一次重來,女主角性格改變了,同一件事發生,但處理態度一改,縦使命運依然,但性格與態度,改變了一些事情既發展,因而改變了結果,情格真係收變了命運,係一個幾值得反思既道理!所以常言道,好多事係命中注定,但用唔同既態度去面對,會有唔同既結果!

雖然係愛情小品單完劇,卻帶出一點道理,有意思!

2013年3月5日 星期二

家姐十四歲生日會

一個14歲少女,仲肯開生日會,都算係咁喇!星期日,幫家姐預早慶祝生日!又係一大班人喺屋企開派對。










可能呢班朋友仔係由 BB識到大,所以都冇咩所謂,而家啲少女心事,真係好難捉摸!



事事都要問過佢先好決定! 好似回禮禮物,本來諗住唔買,費事佢話低 b, 但嗰日佢行過餅鋪,話好得意,買來做回禮禮物,都話估佢唔到啦!



 
今次大家一齊送生日禮物,係大小姐自己話要既 Baby G 錶,佢自己去揀架!



 
呢張相影得兩姊妹好靚,兩個都大了咁多,真係有啲唔捨得!



咁就十四歲喇!想起自己那些年,真係有些感慨!希望家姐好好把握,呢一段青蔥歲月,將來擁有美好既回憶!