北海道九日自駕遊之旅-2014-準備篇

講咗年幾既北海道之旅,明天終於出發喇!

今次去旅行,除了執行李,其他所有訂酒店、plan行程,全部唔駛攪,全部由北海道旅遊達人統籌，超輕鬆！

今次係自由行,但都有成十二人,勁!

一家四囗，—人一喼，北海道,我地來喇!

插花初班-Part 1完成

喺工聯會學插花學了十堂，不過初級仲未畢業，因分開3 part, 而家只是完成了part 1,過多兩星期，再上part 2

初初諗住試下學，點知愈學愈有興趣，我以為自己做手作嘢冇天分，呀！點知又不太差喎！尚算跟得上呢！

十堂既作品

希望自己有恆心完成唒所有課程啦！

西班牙辣肉腸炒瓜子粉

第一次食呢味，係在Rachel果度學煮嘢， Rachel 煮比我地食，一食我就好like！

佢個口感好特別，細細粒似飯多過以意粉，但佢又真係係意粉一種！

迷你瓜子粉，喺一田有得賣

 

 

其實，可襯好多配料，但我覺得配西班牙辣腸最夾！做午餐和party food 都適合。

 

 

做法：

1 先將洋蔥切絲，辣腸切粒，加少許煙肉（切粒）更好味

2 煲水先煮瓜子粉，但不要煮太熟，例如：標籤指示要7分鐘，咁就煮4分鐘，之後隔水備用

3 爆香煙肉，洋蔥、辣腸，加瓜子粉炒勻，加少許鹽、黑椒調味，即成。

簡單、易做、好味！

書展2014

今年書展第一日就去，仲要11：00就入場，原來第一日又不是很多人喎！今年只有我和Kennis 兩個去，兩個女自己和同學去呢！

而家唔駛睇補充練習，就行得自在咗，鍾意睇咩就咩！

都係主力睇烹飪書，另加一啲新書。

結果，我地行了幾個鐘，滿載而歸，累透了！

 

一大堆戰利品！

 

Mango Tree

星期二,好朋友難得放假，約我去high tea, 諗去邊度食好呢?有喇!去Mango Tree, 之前去過—次,覺得很好，於是repeat 去也!

 

 

 

 

朋友仔第一次來,她也覺得很好,環境清靜,人少少，食物質數高,而且食泰國小吃,冇平時西式甜点咁膩，非常正!而且水準能保持,今次第二次,仍覺好好味! 好似置身泰國一樣！

 

呢間列入我心水High tea 之選！

雜果沙律

近兩次派對都有整呢樣。

 

 

 

記得以前讀書時,開派對次次都整呢個沙律,不過，近幾年興沙律菜,所以少整了!

近排,食完又好似好like, 好有回憶既感覺，雜果清甜,岩唒炎夏進食!

不過，一整就要好大盒,岩多人派對。

 

材料:
桃1罐、雜果—罐、粟米粒1盒、蘋果3個、雪梨3個、啤梨3個、薯仔3個、蛋8隻，奇妙醬(我用bb牌沙律醬)

 

做法:
1 將桃、雜果、粟米開罐,隔水備用。
2 把蘋果,雪梨和啤梨去皮,浸鹽水,切粒備用。
3 烚熟薯仔和雞蛋,將薯仔去皮切粒,把雞蛋去殼。
4 雞蛋用5隻切粒,另外3隻切片,作装飾用。
5 將所有材料除了蛋粒,全部拌勻,放雪櫃冷藏幾小時
6 到食時,取出加入蛋粒和奇妙醬拌勻,再加蛋片圍邊，即成

加蛋粒可令沙律更creamy, 但要最後加,避免出水,食時先加醬,也是避免出水!

要沙律美味,必須仔細隔去材料的水份!

婆婆生日會

上星期日7/13,在家幫婆婆攪生日會。

 

以前，通常是我們—家幾囗,出去食buffet 慶祝，不過，而家食buffet愈來愈貴,—家人去都閒閒地二、三仟,好似唔多值,所以今年想特别啲,用啲錢去煮大餐,叫埋姨婆一家來,—齊高興下,仲有意思呢!

 

話唒係婆婆生日會，盡量都不想她粗勞,大部份食物，都是我負責。

 

Memu
芝士、肝醬、沙樂美腸拼盤
小蕃茄三文魚籽蟹肉塔
凍蟹
雜果沙律
清煮海螺
酥脆香草焗羊架
红咖哩火鸭
燒豬肋骨
鮑魚生菜

 

除了鮑魚，其他都是我煮的！

 

 

笫—次整小蕃茄三文魚籽蟹肉塔，跟偽主婦個blog 學，好食,不過擺碟有待改善！

 

 

 

今次先食冷盤先,之後玩話事啤消化下，跟住再食主菜。

 

 

生日會，點可缺少蛋糕？ 

 

 

 

                                        —班人高興 , 開心好多!  呢啲家庭聚會，真係要攪多啲!
 

 

這學年回顧

下星期就放暑假了，兩個女而家大哂，暑假已不需為她們安排活動，佢地自己有自己既節目！

回顧這一學年，連妹妹都升上中一，基本上我已完全放手，沒有參與她們如何溫習，由她們自己處理！因此，今年她們考試成績，全是她們自己努力的成果！

感恩！兩妹妹總算生性，自動自覺溫習，尤其妹妹，比我想像中努力，而且很快也適應中一生活，而家姐今年就比較心散，成績雖然尚可，但仍有很多進步空間，不過，她解釋升上中四高中，就會全力以赴了，希望真係啦！今次，她選科，也是她自己選擇的，大個女了，她要學習對自己前途負責的！

綜合呢個學年，我完全放手了！我既私人時間真是多了很多，不過兩個女都踏入青春期，仍需放時間與她們溝通和管教，不能鬆懈，比起小學時只需重視她們學業，現階段要関注是心靈既發展，做人既態度更重要！

 

Living Plaza

今日，本來想去搵下有冇花藍賣，用來星期五上花堂用。

真係愈來愈愛行十二元店，尤其大間果啲，今日去旺角創興廣場果間，剛裝修了，多了很多嘢賣，超好行！

點知籃就冇，又買了一堆其他用品。

C9就係咁，無事出街少破財，又敗家了！

富貴茶會

期待而久，籌備多時既北海渡之旅,終於仲有三星期就出發！

 

琴晚,在Kenny 家中開荼會,傾下行程細節，其實，今次真係好正,除了機票自己攪,其他所有訂酒店，編排行程，全由Kenny一手包辨,所以我地今次去旅行,咩都不需計劃，達人會安排好—切,超!

 

未出發,先興奮，美其名開茶會，實際又是吃、喝—餐!

 

 

 

多謝Eva為我地預備美食: 有鵝肝多士、柚子沙律、pama ham, 青咖哩，仲有鮑魚撈麵，好富貴！

 

呢餐美食,為我地九日之旅展開揭幕!好期待呀!

紅咖哩火鴨

呢味菜係上星期睇＂吾淑吾食＂學，好簡單又好味！

學到一個技巧，原來椰汁要先用芫茜頭、香茅（拍一拍，出味）、檸檬葉（先搓一搓，等味出啲）、蒜頭，用小火煮30分鐘（一滾即轉小火，因椰汁易起粒，太大火就不幼滑），咁做會令椰汁更香濃，煮好，隔喳備用。

紅咖哩火鴨材料：

火鴨、紅咖哩醬、紅蔥頭（切碎）、椰汁（已加工）菠蘿、荔枝、泰式茄子、葡萄子乾、金不換、雞湯

做法：

1 先用紅蔥頭起鑊，加紅咖哩醬爆香，加雞湯，再加入椰汁煮滾，我會留起一些椰汁之後作收汁用。

2 落火鴨、菠蘿、荔枝、泰式茄子（先用鑊煎一煎），葡萄子乾，煮勻，再加少許之前留起既椰汁收汁，再下金不換，即熄火！因金不換不能煮太耐，會變黑。

好容易煮，味道又似出街食一樣！

插花班@工聯會-初級 Part I- 第九堂

創意花藝

特色： 四面看、高矯形態、花面向四周，宜放宴會之餐卓花、詢問處、角几

火鳳凰

花材：
日本麝香3支
龍文蘭6片
玫瑰10支
桔梗四份一扎
米仔蘭三份三扎
小象耳1支

我的

老師的

新煮意

琴晚自家煮，招乎朋友，今次整了幾個新餸，找朋友做白老鼠！

琴晩菜單：
粟米湯（吾淑吾食學）
小番茄火箭菜沙津配蜜桃黑醋醬，（個醬跟偽主婦本書整）
紅咖哩鴨 （吾淑吾食學）
韓式牛仔骨 （吾淑吾食學）
粟米片炸雞 （大少奶食譜）

除了個湯，全部第一次整，好在全部都成功，朋友大讚，尤其個紅咖哩，真係好好味！

泰式蝦餅

之前睇肥媽既食平D 啲，學了呢味泰色蝦餅，簡單易做，已經煮了好幾次，今晚又整，趁有啲時間，就記得個食譜。

材料：

急凍蝦一包，芫茜根（即芫茜根部），泰國紅咖哩醬

做法：

1 用鹽（啦）下啲蝦，用水沖浄，可僻雪味並令蝦爽口些，整乾切粒再整成蝦膠

2 加適量鹽、胡椒粉、紅咖哩醬一湯匙半，芫茜根，蛋白一個，入蝦膠攪混

3 一個個整成小餅型，下油慢火煎香，即成！

變質

以下既文章，大家不喜勿插，純粹個人意見，希望大家明白，接納不同意見的，才是真正既民主自由。記得和諧不是一佰個人講同一個聲音，而係一佰人有一佰種聲音，而又互相尊重，才是和諧！最近，香港人好似忘記了這種原意！

作為一個C9,不想講什麼政治，只是近日所見到的，實在覺得有些不吐不快！

我是一個絕對支持民主自由既人，我支持普選，但絕不支持佔中！

近日某生果日報、綱絡媒體每日都鋪天蓋地的評述，但我發現，全部是一面倒支持佔中，從沒有一些持相反意見既報導，難道全香港人都支持佔中，為何日日講要有民主，要自由，咁點解唔可以接受有人反對呢？有不同聲音，才是中肯，但我發覺是沒有的，只要你有少許不同既意見，就會被狂插，說什麼維穩，什麼親中，這是什麼道理，有你講，冇人講，是真民主咩？

見到一些家長帶小朋友去遊行，話想我們下一代有民主意識，無錯！這絕對是好事，但近幾年既遊行，似乎也變了質，他們叫的口號，愈來愈激，針對人不針對事，我們行出來爭取普選是對的，但有必要過激嗎？

我們身處香港，其實已經很幸福，今日我仍可自由書寫，有Facebook, 可以自由出入境，比起很多國家，已經很不錯！當然，有普選是非常好既事，但冇，也不會等如沒有了所有既自由！試想想，以前英國殖民地，港督也是空降的，而家我們可以一人一票選，已經是一大進步，大家仍然糾纏在是否有篩選，可否一步一步慢慢來，以中國來說，一人一票已是一大讓步，為何還要處處迫人，用佔中來威脅，適當的讓步也許可爭取合理結果，每次都掟嘢，暴力抗議，會有理想效果嗎？

我們既下一代，是否要在這種環境長大嗎？什麼犯法不犯罪，這是道理嗎？希望我們做家長既，真係要從旁指導他們，要他們有獨立思想，不要人雲亦雲，被人洗腦，利用！

我相信我呢篇文章，有很多人不同意，會覺得我是什麼維穩派，唔緊要，我只是想有果句講果句，如果大家都追求自由，就應該尊重每個人有不同既聲音和意見！

妹妹十三歲生日會 - 傳統派對小食主題

上星期六，預先和妹妹開生日會，連妹妹都十三歲了，生日會既意義，都變成大人聚下開大食會而已！

今次想特別啲，唔整西餐，用傳統派對小食做主題，啫哩糖、波蘿腸仔，砵仔糕、雜果沙律、三文治、咖哩魚蛋、煎釀三寶、炒麵等，原來我地成日開派對，但好多都好少整，尤其這個雜果沙律，細個開親派對都整，而家反而少整。

好在都成功，好味！

啫哩糖，五顏六色，好靚！

阿婆整既砵仔糕，得八個，好搶手！

煎釀三寶

新學既煙肉粟米酥皮卷，都很受歡迎！

仲有薑蔥炒蟹，阿妹大愛食物，點可缺少！

今次整了好多嘢食，食剩很多，好在大家都搶住打包，沒有浪費食物！

好在有婆婆幫手，廿人派對，如果一個人整，一定做死了！

大個女了！

 

好鍾意呢張相，影得好靚，個個都大個女，大個仔了！