查太隨筆

前兩天和朋友食飯，講開而家我地啲小朋友大唒，好難好似以前咁，經常攪些集體活動，一齊去郊外一天遊、去大陸兩、三天遊，或者去下 camp 等，不過，好在果幾年我地都攪得好密，有好多美好回憶！

好在這幾年有寫 blog，可以隨時番看以前既 blog 文，每次活動後，我都有記底，可以看番佢地一齊成長既過程，好感恩自己有用文字和相片，記得當時既情景和心情！

突然間，又想用文字寫返多啲嘢！近年，活動少了，寫 blog 都寫少了，只是偶然寫下食譜，作為自己日後參考用。

既然我有這個 blog 既平台，即使沒太多人看，但作為自己日後看番，回味當時既心情、感受，也是很美好的事！所以，我建立這個標籤 - 查太隨筆，定時寫下文章，抒發下自己既感受！

可以是電影看後感，睇書讀後感，時事分享、個人感受，自己既所思所想，一一記下，為自己既人生，留下一些文字回憶！

五個小孩的校長 - 家長和教師必看

琴日，一個人去看了＂五個小孩的校長＂，超好看呀！我睇戲以來，喊得最勁一次！但全片不是刻意營造煸情位，令觀眾嚗喊，而是故事本身，已經是好好，多處感動人心！

不過，雖然喊了一場，但睇完並沒有 up 住 up住，好傷感，反而是有所反思！

故事其實是真人真事改編，幾年前，我已經睇過報紙報導，真有呂麗紅呢個校長，套戲講咩，我就不想劇透，好希望大家入場支持下，好耐都冇一套咁用心拍既港產片！透過電影，呂校長的故事得以廣傳，令我們大家上了一課！

點解我會話做家長和教師必睇，這套電影主要講夢想和對教育的執著。現今既教育，焦點集中在子女贏在起跑線，學習知識已經不重要了，學校為了生存，教師為了保住份工，真正的教育意義，已經當然無存！呂校長既堅持，令我們佩服！

毎個人都有夢想，無分年齡、階級、男女，講夢想是快樂的！但，能堅持追夢的，又幾多人呢！即使，那個夢想是少少的，簡單的，我們都要付出和堅持，才有可能達到！

戲中的五個小孩，有非常精采的演出，而楊千嬅既表現，亦是我看過她既戲之中，最真情自然既一次！

戲中，以喝采貫穿整部電影，加上ending既小太陽和友誼萬歲，令電影更加令人共鳴！令觀眾動容！

好喜歡戲中一句：「以生命影響生命」，教育本身意思如此，為何現今變得咁商業法？

希望有更多個呂校長出現，我們的下一代，才有希望！

Hong Kong Really Really Free Market

我係一個好鐘意儲物既人，年青時儲青春雜誌、書簽、火柴盒、香水辨等.....

不過人大了，住屋空間有限，好多都放棄了！但，我仍有很多珍藏。

近一、兩年，開始覺得人要過簡單生活，愈簡單愈好，身外物太多了，想掉，又不捨得，無意間，比我在Facebook 發現了一個地方 -Hong Kong Really Really Free Market，可以放底自己不要既物件，然後又可去取些自己岩用既物件，全部免費，我覺得不錯喎！又環保！

佢地每個月都會在不同地方舉辦活動，我已參加了兩次，兩次都是放底物件，希望我啲珍藏，可以交給喜愛它們的人，好過就咁掉了！

我有好多珍藏書和VCD呢！不過，其實，放喺度多年，都係得個儲字！

都有好多人放底物件架！

現今社會，物資豐盛，人們擁有太多了，呢種互相交換既平台，是很值得推廣的！


https://www.facebook.com/hkrrfm?fref=ts

家姐十六歲生日會

又到家姐生日會了！十六歲喇！已經係少女了！生日會其實都係大人聚一聚的藉口，今次連埋圑拜呢！

今次食物比較簡單，因有幾位朋友都就不到時間冇來！

呢個韓式炸雞，好正！婆婆整架！

今次個雪糕蛋糕，好好味！

成日笑家姐，甜蜜十六歲！

第一次的插花工作

收到妹妹學校一位家長邀請，希望我可插盆花，給她們在學校開放日，賣曲奇的枱裝飾。

這是我第一個插花工作，雖然今次是義工，但賺到了經驗和實習機會，是十分難得的！

由於今次 Budget 很少，所以花材選擇不多，我選了太陽菊，夠平嘛，但原來配花和葉，相對也貴，加上一盆既材料，其實樣樣用少少，也是錢呢！結果，我在花墟行來行去，行了成個鐘，先買好了花材，真是一個好好的體驗！

我前一天早上就買定花回來，因要養水，花先會靚！果晚先插，啲花已開得很燦爛了！

插好了後，發現剩下很多太陽菊，於是插多盆，用盡啲花材。

第二天早上，送去學校，大家都讚！好開心呀！

農曆新年假期回顧 - 2015

成個月冇寫 blog, 新年後忙東忙西，好似好忙咁，但實質又好似無事忙。




過了三個星期，先寫返今年農曆新年假期回顧！



今年過得好 hea, 除了指定拜年外,













果幾日都係勁悠閒，所以今年睇了最多戲，看了三套賀歳片。



不過，想講下今年既準備，除了整蘿蔔糕外，今年因學了插花，所以自己插了些花賀年。







還有年廿九，去了 Rachel 度學法式鳥結糕，作為款待客人食物！






今年最特別是，家姐做年宵，我和查生 N年未試過年卅十晚行維園呢！雖然好多人，但阿囡賣嘢，梗係要支持，連契爺、契媽也有來呀！