小六生血淚史 - 第二次呈分試

聽日家姐就考第二次嘅呈分試，呢兩日都留喺屋企閉關温書。雖然我明白唔可以迫得家姐O甘緊，但佢有時慢吞吞嘅態度，真係令我好火！相對上一次嘅呈分試，今次我更加緊張，可能聽完啲中一簡介會，了解得愈多，就愈死！加上近期被某事煩着(雖然表面上，已經解決咗，但實際上仲要忍多幾個星期)，心情大受影響。而家我唯有不斷話比自己聽，咩都唔好理，過咗呢四日至算啦！

其實，原來幫人温書，仲難過自己温，唉！唯有盡力而為啦！

與 blog 友見面@Tubino

今日約咗從未見過面嘅 blog 友 Amy，同埋大少奶喺Tubino 食 lunch。雖然第一次見 Amy，但係都覺得好親切，好似識咗好耐，可能大家都有個讀六年班嘅女，話題就更多。

嚟過呢度第三次，第一次影到間餐廳全景。

今日啲相用部新 iPhone 影，唔知是否未習慣部機，啲相影出來麻麻地，大少奶唔好意思，要借用你啲相。

呢杯餐前飲品，係同大少奶嚟先送架！幾好飲喎！

呢幅我用 iPhone 影，係唔係同大少奶影嗰啲差好遠呢？

今日餐湯: 粟米海鮮湯，好味！

我叫嘅豬扒配鵝肝醬汁，個豬扒做得好出色，唔會鞋口。

大少奶叫嘅羊。

Amy 叫嘅鱸魚。

同大少奶來，連甜點都升級，呢個朱古力mousse，係要凍食，我唔太愛甜品，但我都覺得呢個好掂。

蘋果tart，呢個反而普通啲。

心太軟，I like it!

跟餐嘅甜點都唔錯架！

我杯咖啡好靚架！

餐飯食到三點幾，但都好似傾唔夠喉，呢幾日心情麻麻地，但同佢地食完飯後，心情好返好多喇！好期待下一次啊！

臨走見到個紫色聖誕老人好靚。

 

 

 

 

傷心鵝掌門

心煩咗幾日，想出去行吓，琴晚同查生出去打邊爐，今次去食麻辣火鍋。其實，暑假嗰時，睇完本[我的愛如此麻辣]，就好想食一餐麻辣火鍋。

[傷心鵝掌門]，個名都好怪，地點都幾辟，係大角嘴。

正宗嘅四川麻辣湯底，不過我地都叫咗少油少辣，同食開[小肥羊]嘅好唔同，唔係正係得過辣字，個湯底好香。

啲鵝腸仲好食過[名城]，但又平過佢。

叫咗好多嘢，都係三佰幾，比去[小肥羊]抵好多。

 

 

小六生血淚史 - Portfolio

終於完成了份 portfolio，呢份只係 standard 嗰份，至於每間學校有每間嘅要求，到時一月交表再執，而家要做只係打好哂啲資料，整理好啲 cert 呀、獎狀等。

攪掂份 portfolio ，暫時應該可以停吓喇！

小六生血淚史 - 鎖定目標 -協恩中學

琴日去完協恩中學嘅中一簡介會，感覺非常好。雖然佢地已經係一間好出名嘅學校，但佢地仲好有心機辦呢次簡介會，令人感覺佢地的而且確係用個心去做，唔似一啲以為自己係 brand one 學校，就唔需要再招攬學生，簡介會就求其了事。

校長講佢地係一間注重全人發展嘅中學，其實我聽過好多學校，都係用此為重點，但實際有幾多間真係做到，我相信協恩一定做到，從校長嘅講話，感受到呢間學校唔係只着重成績，佢地更着重培養學生做事嘅態度，注重團隊精神，對學生成長好有幫助，成績好嘅學校好多，但成績好而又用心辦學嘅就很難求，協恩絕對是其中一間。

校舍雖然舊啲，但環境很清靜，好鍾意呢間教堂，好似九姑娘和劉醒成日去嗰間。

睇完協恩嘅感覺，和幾年前睇完馬小回來一樣，真係好鍾意呢間學校，亦都覺得好適合家姐，不過好學校就多人爭，希望和考馬小一樣，最後成功就好了！

由現在開始，我會每天禱告，願主保守家姐，可以有機會在這校讀書，我相信主會聽到我嘅祈求，為家姐安排好，感謝主！

小六生血淚史 - 資料搜集

踏入十一月，開始為升中作準備。剛開完家長會，又去了一些學校嘅簡介會，取了很多單張，加上買了兩本天書 ，需要整理吓啲資科，所畏:[知己知比，百戰百勝]，選中學之前，一定要做足功課，看清楚、想清楚，所以做家長嘅都會好忙碌架！

小六生血淚史 - 中學巡禮篇

琴日一早八時，一家四口就到達學校，参加九龍城區攪嘅中學巡禮。其實上年已經参加過，今年想睇埋迦密和旅港，所以再参加多一次，今年帶埋妹妹一齊來，等佢聽埋，下年就唔再参加，因為一日去八間，真係好累！

今年比上年好，家姐啲好朋友一齊來，佢地好似旅行O甘，玩足全日，而我都無O甘悶，可以同佢地啲媽咪傾計，大家交換吓選校嘅心德。