三母女首爾自由行 - 2013 - Day 4

Day 4 梨大  ~ 明洞夜街 / 東大門 夜街

因為前兩天實在太累，今天我地十一點先出發，先去食紫菜包飯做早午餐。

好味，但好辣!

食飽飽就出發去梨大，到了第四日，終於掌握到呢度既地鐵線。

由明洞既乙支路入口站，撘2號線往市廳方向去梨花女子大學站下車。

上次跟團來得兩個幾鐘，行唔夠又買不夠，今次大把時間喇!

棃大呢頭，好似荃灣咁，商品價錢比明洞相宜，而且近大學區，款式比較年青，好適合查氏兩姊妹，所以佢地買了好多衫，價錢亦很平。

橫街小巷、斜路多，但有不少細鋪好有特式

結果，行了幾個鐘，已經滿載而歸。

 

不過，唔知點解，表姨媽一家就買不到咩，我地分開行，佢地話呢度男仕服式冇東大門咁多，而我地女仕在這裡，卻很岩行呢! 可能近女子大學掛! haha!

今次比我發現了，原來在這區買護膚品，有很多贈品送，原本諗住護膚品，留在明洞買，近酒店唔洗攞住行咁遠，後來無意入了一間 Tony Moly 睇下，雖然所有護膚品是公價，但呢度有好多 package 明洞冇，如果買得多，除返呢度抵好多，又有好多 sample 送，最正是有送貨服務，送去酒店，唔洗攞住行街，就係咁，我買了很多面膜呀!

行到五點左右，又返酒店休息下，之後再在附近食晚餐。

今晚食 Pizza

本來食完飯， plan 了去多次東大門，但兩位小姐唔想去，咁我地四個就在明洞附近行下，佢地一家再去血拼過。

 

三母女首爾自由行 - 2013 - Day 3

Day 3 ~ 愛寶樂園 ( Everland)

其實，有了第二天經驗，我地都冇咩信心去到，因為都幾遠，而且有老有細，呢度啲指示又不足，但幾個細都想去，於是依舊去了!

我地先撘地鐵去到蠶室站 6 號出口，去到馬路中有個巴士站，撘 5700 到總站，車費HK$12.5，到了總站再撘 shuttle bus 去 。

我地10:30 明洞出發，成 12:30 先到，門票 around HK$250。我覺得係廸士尼、海洋公園加長隆動物園混合體。

 

 

 

 

 

 

值得一提係，個動物園好好睇，有北極熊、企鵝等特別動物睇。

 

 

 

 

 

 

 喺園內食嘢都算合理，唔會好似香港廸士尼咁，又貴又少又不好吃。

一個 set 賣港幣一佰元多啲，而且味道不錯。我地三點幾先食 lunch , 好在食飽個肚，當晚很夜食飯。

 



本來 plan 了六點就走，點知行下、睇下，攪到成八點先撘車回程，因為巴士站名冇英文，入夜後，又不太認得早上上車既地方，車內人又多，要企足全程八、九個字，仲要金精火眼，數車站驚走了雞，超辛苦!

幾經艱辛，終於回到明洞，已經十點幾，求其在酒店對面間餐廳吃晚飯。

 

今餐食豬手

 

冷麵

 

剪餅

 

  食完餐飯都十一點幾，經過兩日辛苦行程，我地決定明天遲啲先出發，要休息下!

 

三母女首爾自由行 - 2013 - Day 2

Day 2 ~ 鐘路北村韓屋村  ~ 東大門

第二日， plan 了去觀光。選了鐘路區北村韓屋村。

由於韓國酒店唔包早餐，我地行出酒店附近，有間 coffee shop 食。





 

 

呢間啲麵包和三文治好好食，不過就唔平，一份三文治加咖啡，要成港幣五十幾。後來才知道，呢間是連鎖店，喺首爾週圍都見到! 之後一日又再來多次呢!

我地撘地鐵去安國站，但我地第一天，摸不熟個地鐵線，原來要轉線，但我地又不知，居然行了成個站先上車，行到傻!

個地鐵路線很複雜呀!

其實，正確去鐘路區北村韓屋村，如果由我地酒店出發，最近地鐵站是乙支路入口站，撘 2 號線(綠色) 往十里方向，撘一個站到乙支路3街站，轉3號線(橙色)往大化方向，再撘兩個站就到，根本很方便，而我地居然沒有在近既乙支路入口站上車，行了去下一個乙支路3街站，雖然唔洗轉線，但就行多了很多路!

終於，到了北村，這裡是熱門韓劇拍攝地，是首爾市中心最大既韓屋村。

 

 



 

其實呢區係遊客區，有好多博物館，不過間間都要收費，我地冇入去呀! 呢頭幾寧靜，行下、看下，附近又有啲商鋪行下，之後，我地食完午飯，就慢慢行返去撘地鐵回程明洞。

唉! 不過回程時，又好傻的出錯了站，出早了成個站，結果好似茘枝角行去深水埗咁，行到大家冇哂心機 ! 本來 plan 了去樂天百貨都唔去，嗱嗱臨返酒店休息!

經過一輪休息，六點又再出發去東大門，今次我地在酒店 book 了架大型的士，可坐我地八人，不過都幾貴， HK$210，但其實車程很短，不過今天大家都好累，唔想再撘地鐵了!

其實，酒店有 shuttle bus 去東大門，不過要夜晚八、九點後，因為東大門啲店鋪，大多開晚上八點。但我地又不想太夜，所以先去食晚飯。

去到東大門都是六點幾，週圍行下揾嘢食，果日天氣好好，啲雲好靚!

最後，我地找了間好地道既食店，好似快餐店咁，入去食。有冷麵、韓色炸醬麵、炮菜鍋等等，味道都唔錯，而且呢餐價錢相當便宜。

食完都是七點幾，要週圍行等啲商場開門，所以其實頁係不要咁早來呀!

東大門是時裝零售批發市場，像香港既茘枝角、深水埗區咁，不過，我地行了幾個商場，女裝款式比較斯文，亦不太便宜，反而男裝又型又抵，表姨丈和表哥，兩父子入了很多貨。

最後，因 miss 了一班酒店 shutter bus , 於是決定撘的士，唉! 原來司機唔多識路，就算車內有 GPS，都揾不到，幸好有表哥在，有個男丁，都冇咁驚，司機又唔多識英文，好在我地見都在酒店附近，認得個地鐵站，於是叫佢停車，我都自己行返去，費事唔知一陣車了去第二度仲死!

結果，第二天旅程，真係行到腳軟!

 



三母女首爾自由行 - 2013 - Day 1

暑假最後一星期，我地三母女加婆婆，和表姨媽一家，又去了韓國。上次買唔夠，今次再去過。但查生唔去，因佢唔 like shopping , 今次自由行，佢知我地買到傻，所以唔來。

不過，去韓國自由行，比想像中難，溝通困難，指示不足，加上查生唔來，我地全部都冇咩方向感，成日行錯路。

Day 1   明洞  ~ 晚飯 @ 那度香  ~  行夜街

今次唔撘零晨機喇 ! 咁辛苦 ! 撘 9:30 機， 由於韓國早香港一個鐘，落機成三點，過埋關再喺機場兌換錢、租 wifi 蛋及電話，攪了成粒鐘，先出去撘車。

一般機場兌換率較低，我地只係換少少來撘車，出到明洞先再換。

喺機場我地租了 wifi 蛋，一部可 share 三至四人，我地租了兩部。每部按金 HK$2000，可用信用咭支付，但暫不過數，之後每天 around HK$50 ，無限上綱，抵架! 如果幾個人去，租兩隻好似我地咁，行街分開兩 group 人，用 whatapp 聯絡都得，好方便! 另外，如要打電話返香港，而對方有用 line ，就電話都不需要租，我和查生幾天都是這樣溝通呢!

因婆婆要打比公公，所以我都租了部電話，按金都是HK$2000，每天租機 HK$28，另每分鐘HK$7。

攪好所有野後，去撘機場巴士，我地撘 6015 去明洞 , 每人HK$70，大約一個鐘，不過要好小心留意通告，會經好多間明洞既酒店，好彩我地落車，行去酒店都近 !

終於到我地住既酒店了 !

酒店都好新，好企理，位置亦好方便，樓下好多野食，又近地鐵站，行 5分鐘就到，行去明洞 shopping 街都得，好似香港銅鑼灣咁。

每層走廊都有不同主題，我地呢層好 fancy !

 



放低行李，休息一陣就出去食晚飯。我地近近地在明洞食，去了一間幾出名叫 "那度香"食烤肉。

 

 

我地叫了牛、豬烤肉、部隊鍋和石頭鍋飯，味道都 OK ,不過，我覺得呢度間間烤肉店，水準都差不多，所以之後，我地食野都冇咩刻意去找出名，就腳就算 !

 

食完飯就行街街了，又食下街頭小吃。

 

 





第一晚，已經有咁多收穫 !

 

 







新的開始

因為 Yblog 停用，所以就搬過來這裡，希望在這裡，重新開始!

其實，世事真的很湊巧，六年前第一次寫 blog , 開始在九月，今次搬 blog, 又在九月，足足六年了，寫 blog 陪伴了我這六年全職媽媽歲月，正當妹妹也升讀中一時，我多了很多私人時間，正為以後既歲月，尋找方向時，Yblog 給了我一個機會，連寫 blog 也有新開始!

未來，我希望這裡，除了記底我們一家既生活片段，還希望分享多些我自己既更多事情。

有排攪

琴日開始 download Yblog, 今天終於收到通知話攪掂，一堆 zip 了既 file ，不過都係要人手，逐個逐個 copy & paste 過來，有排攪呢 ! 唯有慢慢做啦 ! 六年既心血，真係唔想冇哂。

其實，而家攞返啲備份都好，可以 save 返喺 hard disk，唔洗突然冇哂咁慘 ! 但我發現冇咗好幾篇 blog  , 唉 ! 都唔強求喇 ! 希望呢度好啲，冇咁多問題啦 !

再見 Yahoo Blog

去完旅行返來，第一件事看到 Yahoo Blog 要接！

唉！我一開始寫 blog , 就在這裡，一寫寫了六年，其實寫 blog , 對我有一個特別意義！

記得當年剛決定做全職媽媽時，就開始在這裡寫 blog ，想記底一些日常生活、兩姊妹成長片段等，希望留待日後回憶，雖然我不是人氣 blogger , 但在此, 我也認識到很多其他 blogger , 經常去看看她們既 blog , 有時仲留言溝通，像朋友般！



但最大得著是，我真正認識了兩位 blogger , 會約出來見面，之後成為好朋友，一個是人氣 blogger 大少奶，一位是 Amy ，所以 Yblog 冇了，也有一點不捨!



而家最重是，下載返以前既 blog , 我真係不希望冇哂呢!


不過，我會繼續在第二處寫blog 架！新 blog 在: http://saraleung212.blogspot.hk/