聖誕花飾

除了上插花班會有花插，有時我會自己插下花，尤其假期日子，剛過去既聖誕，自己都插了些花。

我在花墟買了20枝紅玫瑰，都係$80，超抵，因有咁多花，我插了三盆花，加埋其他花，大約買了三佰元多。

這盆給婆婆的，我最滿意的！

呢盆送了比我好朋友，也不錯！

自己果盒，反而覺得麻麻地！

還有呢扎，比我99，都正架！

插完三盆，還有好多玫瑰剩！

䐡插也很美！

中班 - B1- 鮮花花球班

繼續追番之前既花堂課程，來到中級既第一階段，是專學結婚花飾如：花球、襟花、頭花、花車裝飾等，15堂



B1其實好難，好多手作手功要做，每次上堂做到死死下，上諌時間由之前工會個半小時，變為三小時，而且以前是看完老師示範，回家做功課，中班就要即場完成後先可放學，都比較趕和辛苦。

不過，遇難愈強，正因我手作差，我更加努力，雖然效果不是很好，但盡了力，而且以我來說，做到有五、六成，算好好了！更加因為B1,令我更確定自己會繼續學下去！

襟花





手腕花

花球








手挷花束

小型棒花

花車裝飾

學插花歷程

講下我學插花既歷程，由2014年5月起，我參加了工聯會和美國花藝學院辦既花藝學院C級文憑課程，分 part I ， part II , part III 三階段，共45小時，差不多上了九個月。

初初諗住試下，看自己有冇興趣先，而且我是一個不善手作仔手功既人，學插花講求細緻，耐性，對我來說是一大挑戰！

慢慢學上去 ,覺得幾好玩，而且愈來愈愛上花，看見插好的一盆花，好大滿足感！看見美麗既花，心情都好啲！

到了15年3月，開始上中級課程，上堂不在工聯會，轉了去喬林社，中級分四期， B1-B4,共上147小時，估計要上完大約要年半時間，我而家上緊B3, 仲有排上。

去到高級，分三期， A1-A3, 共30小時，讀完後，可參加在台灣舉行既高級教授文憑檢定試，考試前還要修畢三個月共30小時既備試課程，先可赴台考試。合格後就獲發美國花藝學院師範文憑了！

條路仲有好長，不過我會比心機的，希望真係學到一門手藝，可以考到些認可資格，算係有個人生目標！我希望可以成為一個花藝師，這是我以前從來沒想過會想做的！

B3課程-1

餐桌花，四面看，著重平衝feel








設計特點：以彼得麥爾環形設計為出發點，然後其他花材作環形或放射狀向外插。




老師的

B3課程-2

講過16年想寫多些関於插花上堂既記錄，就由今天開始，之前果啲希望，慢慢可追番。

來到B3既第二堂，今日講鮮果與鮮花

設計構思：從一個鍋型盆引發創作𩆜感，盆的中心可擺放水果，周邊點綴上鮮花。擺在廚房或餐桌頗為有趣。

老師的

這堂要先在家裡做家課，用蘆韋草沿碟型花器扎一架構，以作插花支持點。

又係一心機手作仔嘢，在家做了差不多三粒鐘，自己一向手作仔麻麻，

上面是我的，下面是老師的
第一次做，算似啦！（自我陶醉）

由於最難部份已經完成，上堂時只是在旁加花就可，很快完成！

今次用了青青、黃黃加白系列，幾fresh!有啲泰feel！

都幾得意的組合，農曆新年，可試下用啲紅色既花，加些紅系既生果，作擺設也不錯！

大嶼山一天遊

秘密花園第一篇，是遊記。不是什麼出國旅行，只是昨天去了大嶼山一日，去了大澳閒遊了幾個鐘。

朋友們相約放假入大嶼山兩日一夜 camp,朋友 book了公司在大嶼山渡假屋，佢地星期一下午就入去了，我因為查生出 trip,所以要留在家，所以不能來過夜，於是，昨天早上一早，就入來 join她們玩一天。

相約十點在大澳巴士站等，原來而家去大澳也很方便，我先撘地鐡去東涌，再在東湧撘11號巴士去大澳（總站下車），車程大約45分鐘，唔駛好似以前又撘船，又撘車咁煩！

大約十點到達大澳，朋友們已在巴士站等緊我，她們住在梅窩，也是坐巴士來會合我的。

我們在大澳週圍行遊，行手信街，邊行邊買地道小吃食，昨天天氣好好，又週圍拍照，行去大澳警局酒店、棚屋等影相，啲景好靚！

大澳比人感覺好寜靜，我第一次來，我覺得人少少，好舒服！

不經不覺，行了四個幾鐘，我都慢慢行，一點也不辛苦，兩點半撘車回梅窩渡假屋。

回到屋三點幾， hea下休息下看看電視，五點開始 BBQ

四個人BBQ慢慢燒，好正！

燒到八點幾執嘢走，撘九點半班車回東涌，一日遊結束了！

我地四個都玩得好開心，其實，香港有好多地方都好值得去，放假也不一定要外遊，這種兩日一夜本地 camp也不錯，希望下次可以來埋過夜，就更正！

新 Blog名：查太的秘密花園

2016年，新的一年，新的改變！自從2007在yahoo開始寫 blog,到現在都有8年，踏入第九個年頭，想攪攪新意思。

由做全職媽媽那年閞始，就開始寫 blog,想記底下兩姊妹的成長片段，生活事情，或者自己一些心情，希望將來可看回作一個留念。沒有刻意經營，不是天天update,所以也不是什麼人氣 blogger,個 blog冇咩人看，都係自己用來回味居多！


不經不覺寫了咁多年，有時睇番都好開心！隨著兩姊妹長大，她們都不想我寫太多佢地，她們亦有自己的生活，這個開始屬於我自己了，呢幾年我變化很大，由從前的OL,變了C9,但我不比自己 out, keep 住進修，學西餐、學插花，人亦變得有耐性了，冇以前咁急性子，不知怎樣，以前做手作仔一向不濟和沒有太多藝術細胞的我，卻愛上了煮西餐，插花，兩樣嘢都需要有藝術 sense的，尤其後者，但我卻喜愛極了！

改了個新 blog 名為秘密花園，希望這裡是我的小天地，亦因為愛花，希望在此分享我學插花既過程，坊間有好多 blog 分享煮嘢食，但我就發現好少分享插花既 blog,所以我想試下用文字，記底學習其間既事，亦希望試下找下喜愛插花的 blog友仔交流下，15年好懶，寫了50篇，但願今年勤力些，在這個小小的秘密花園，分享更多呢！