步行運動

近期愛上了行路，經常去附近公園慢行！

從來我都冇話要啲起心肝減肥，可能我係怕自己三分鐘熱度，而有好多次我曾嘗試，但都不能持久，我亦好怕節食，我實在太愛吃了，不過，人大了，為了健康，確實有所需要，既然不想節食，就要做運動了！

但太肥，不宜跳步，我選擇了試下步行，其實，呢個公園好大，環境不錯，慢步、散步也很正！

一路行，一路聽收音機，一個鐘好快過，通常下午3點左右，平時大多數在家上網，而家用呢個時間，去做下運動，也不錯，雖然不算什麼大運動，但如果 keep 到，也算係一個好的習慣！

上星期六清明假期，下了成個星期雨，趁好天氣，又約了朋友去佢家附近行下，行下、傾下，好舒服，原來慢行散步，也是一個不錯的運動呢！

一起吃飯吧

無意中搵到呢套韓劇，"一起吃飯吧＂，睇了一集覺得好睇，又繼續煲落去，共16集，好快就看完！

雖然呢套劇唔多出名，又沒有什麼大明星，但勝在愈冇期望時，反而有驚喜。

故事以美食作為人與人之間的聯繫，講述幾個獨居的單身族，通過聚餐而成為好朋友，當中日常發生的趣事！

女主角很愛吃，經常用吃來減壓，但從來不會一個人去餐廳吃飯，而男主角很懂食，對食好有要求，是一個人氣美食博客，佢地之間經常發生吵嘴、誤會，發生不少趣事，戲中人物不多，來來去去都是果幾個，但個個都做得生動惹笑，極度生鬼，每次食嘢時都表現得十分享受，美味和幸福，而且所拍的食物鏡頭，比美食節目更使人垂涎三尺！所以，每次睇都覺得好肚餓！

其實，呢套戲故事相當簡單，每集都有一個主題，而當中又有牽連，好似我地香港既處境劇，全劇輕鬆愉快，絕對值得推介！

最後，我好欣賞大結局最尾個段，那段對白＂獻給因為孤單吃很多飯的你，獻給因為厭倦睡很多覚的你，獻給因為悲傷哭得很多的你，我寫下，把陷入困境的心當作飯一樣咀嚼，反正人生都是要由你自己來消化的！＂

Dinner Buffet @ The Food Gallery

好耐冇食 dinner buffet, 而家通常都愛食 lunch buffet, 琴晚去了朗廷酒店既 The food gallery 食 dinner, 幾位好朋友放假，下午先去家整玻璃曲奇，之後去食 buffet, 又玩又食的一天！

其實，我之前都來過兩次，之前叫 L' Eclipse, 不過都係食 lunch , 覺得都不錯，就來試下食 dinner buffet 啦！

朋友愛吃生蠔，結果冇令她失望，呢度生蠔分三款，有美國、澳洲和太平洋，放喺度任你選，我地好開心，食了幾轉，發覺太平洋最好味，雖然細隻，但最有蠔味和 creamy，我和朋友每人食了差不多兩打！

 

海鮮仲有好多款，有龍蝦，蟹腳、凍蝦、瑟琶蝦、青口、翡翠螺等，都不錯呀！

另外，呢度有即場煎鴨肝，非常肥美，我都忍不住食了三件！

其他食物有沙律吧、Pama ham, 肝醬、又有蒸魚、燒味、焗蠔、咖哩等熱食，雖然款式不算多，但樣樣都幾精緻好味！

 

 

甜品款比較少，但對於我不太好甜品既，有雪糕就可以喇！有我最愛的焦糖雪糕，大愛！

結果，我地幾個都十分滿意呢餐，最驚喜是，原先以為用信用咭有85折，已經好好，點知埋單時問下，如果在佢地Facebook page like 有75折，嘩！$598 （+10%） 之後75 折，即$494 一位，超抵！

以咁既價錢，有咁既水準，算很不錯喇！值得推介！

意式香脆麵包

呢個小食很適合 party, 易做又好味！

材料： 法包 1 條，切成10 - 12 片，特醇橄欖油，番茄 4個，蒜茸2 茶匙，黑椒碎1茶匙，羅勒葉20片切絲，檸檬汁2茶匙

做法：

1 將番茄切粒，與蒜茸、黑椒碎，檸檬汁及1 湯匙橄欖油拌勻，待用。

2 將切片後的麵包掃上橄㰖油，放入已預熱之焗爐以150度焗8分鐘

3 取出麵包，以大匙將拌好之番茄鋪於麵包上進食。

假日自助午餐@Sabatini

來過這裡三次了，水準依然 keep 到，我覺得星期六、日既假日自助午餐好過平日既 lunch set。

環境充滿歐陸情懷！

 

 

頭盤和甜品，是自助形式，果汁和意大利汽酒是任飲，另還有餐酒一杯，對於喜愛飲酒既我地很like ！

呢個意式魚生多士好正！香脆多士配上三文魚、吞拿魚，加埋一些羅勒和辣椒汁醬，酸酸甜甜，加上魚生既鮮味，一絶，我食了兩塊呀！

盤還有Parma Ham ，蟹腳、翡翠螺、沙律、湯、飽和芝士等，種類不太多，但勝在樣樣新鮮！

食完頭盤，每人送一半隻龍蝦，

之後再來一客意粉，我地要了少份量。

主菜點了一客鵝肝和一客羊，超正！

甜品是我取了我最愛的拿破拿，加埋一杯咖啡，perfect 的一餐！

姊妹聚會

呢班姊妹真難約，話 gathering 都講咗幾年，今次啲起心肝約，都要兩個月前約定，好開心終於人齊聚一聚！

其實呢班姊妹相識了很耐，我入電子界就識佢地，成班午飯腳，雖然唔係成日見，但原來玩起上來都幾瘋癲！

 

當晚除了磨菇湯，沙律外，還整了意式香脆麵包，香草楓樹糖燒雞，酥脆香草焗羊架，煙肉炒法邊豆和意大利飯。

 

 

 

一位姊妹買來好喜愛既馬卡龍

 

成晚除食嘢外，就係玩自拍！玩到忘唒型!

 

 

嘻嘻哈哈又過一晚，希望以後keep 住攪下呢啲gathering ,唔冼又等 N 年先成啦！

張玉貞,為愛而生

繼續韓风,本來煲完星星後，諗住煲繼承者們.不過睇完1集後,比另—套打了尖!
 

之前睇廣告已知,高清做緊呢套戲，不过個名叫：—代紅顏，張玉貞,好似好娘咁,就冇諗过睇。後來有朋友話,好好睇叫我試下，咁我就開來看看,唉!不得了,第—集已迷上！

 

其實，我—直喜愛看人物傳記,不過，好多都好長好多集,唔想追,呢套得24集岩哂!
 

套戲講一個女子叫張玉貞,佢做幫人做衫，啲衫做得好靚，佢好似而家既時装設計師,好多名流官太，都揾佢做衫,非常之出名,之後認識了當時既太子，輾轉入了宫做了禧嬪,在宮內過着鬥爭既生活，最後被人害死的!
 

呢啲故事，其實都看了很多,不外乎勾心鬥角,爭權逐利,表現出人性既醜陋，但呢套戲除了這些，仲係一個好感人既愛情故事，這是傳記改編的，是真人真事，肅宗係朝鮮好出名既一個皇帝，但佢對張玉貞是一心一意，由少年時已認定了她，為了她不惜一切與朝臣作對，一直守護她，雖然中間曾經懷疑过,傷害过,但最後仍然緊靠—起,只可惜最终張玉貞難逃—死，但他都盡了最大既努力，好少皇帝咁情深，好感動呀！
 

呢套戲的衫都好靚，好吸引我，我睇呢套戲時睇到我好緊張，見親啲奸人一出，我就好想鬧佢！我睇到好鬼投入，我個人認為呢套仲好睇过星星好多呢!