更甚

病咗足足五日，今日好啲喇！但情緒十分低落！唉！當家姐嘅情況有所改善時，妹妹嘅問題又日漸嚴重，妹妹並沒有甚麽其難雜症，係一個普通正常嘅小朋友，駁嘴、懶散就係佢最大嘅問題，什麽事都求求其其，咩都唔想做，話佢幾句駁到妳暈，要知，我嘅 EQ都唔好，駁得幾嘢，我就發癲！

每次兩姊妹考琴，我嘅情緒都好差，要 push 佢地去練，係一件苦事，所以我好怕佢地考琴，今次阿妹考 3 級就更甚，其實佢一直都唔太鐘意彈琴，亦都沒有什麼天份，只是查生有佢嘅堅持，覺得唔可以比佢中途放棄，佢細個都係迫出來，所以一路要阿妹學，上次我叫佢停學大提琴，都比查生閙咗一餐。其實，我都同意做事唔可以半途而廢，但如果佢學咗三、四年都無興趣，O甘都係時候放手啦！

好喇！今次唔放都唔得，佢嘅無心機、駁嘴和懶散，激到 Miss 話教完佢考試後，唔教佢喇！唉！比 Miss O甘講，我真係覺得好肉酸，我以為阿妹會好 hurt，點知佢不知自己錯，仲嘴 mui mui ，以為 Miss 嚇吓佢，只要下次專心啲，就無事，但係琴日練琴時仍係得過且過，一啲悔意都無，呢個女比起家姐更難攪！