應承咗考完試整漢堡包比兩姊妹食，一直未對現，今日趁住假期，終於整咗比佢地食。
之前見 blog 友仔話和牛漢堡好好食，於是今次買來試吓。
好貴, $39一件，不過一分錢一分貨，兩姊妹話好好食！
做法:
1. 先將洋葱切絲，加少許香草略炒。
2. 將漢堡煎熟
3. 將包放入焗爐略烤
4. 將漢堡、洋葱及一片芝士放進包中即成。
由於我唔食牛，我嘅午餐係凱撤沙律。呢個沙律最重要係個汁。
凱撤沙律汁材料:
蛋黃 2隻 法式芥末醬 10亳升
意大利香醋 30亳升 蛋黃醬 250亳升
巴馬芝士 (磨碎) 40亳升 鯷魚 3塊
黑椒碎 少許
做法:
1. 把蛋黄、芥末和醋攪打在一起。
2. 慢慢加入蛋黃醬，不停地攪拌，直至調味料均勻柔滑。
3. 加入芝士、鯷魚拌勻，調味。
4. 將汁加入沙律菜、煙肉碎、麵包粒攪混，即成凱撤沙律。
今年嘅澳門拜山團，有別於以前，我地跟旅行社去珠海三天團，第三日喺澳門走時，就順道拜埋山。
復活節假期第一天，六點已經要喺中港碼頭集合。我地呢個團都比較 Hea ，先搭船去珠海，睇三個景點，就返去海泉灣酒店，第二日喺酒店自由活動，第三日食完早餐，就搭車去拱北過關，到澳門自由解散。
四個表兄弟妹。
第一日午餐，食特色客家菜。
復活節都總有復活蛋和復活兔！
第二天因為係無行程，我地就自費去神秘島玩。
呢個 E型過山車好刺激！佢地四個夠胆玩。
爸爸佢地四個就喺上面吊住咗。
家姐樣樣都唔敢玩，唯一要求要玩撐船仔，就比佢玩啦！
表哥陪佢玩。
幾個細路喺神秘島玩到唔願走，我地五點幾先走，真係玩足一天！
因為無帶 charger ，個相機無電，之後嘅行程都無得影相喇！
兩晚喺酒店都有浸温泉，第二晚仲揼埋骨添！
我地兩晚都訂咗泥(會)雞做宵夜，我覺得好味過上次長隆嗰啲。
呢個團啲行程都幾舒服，最辛苦係第三日喺拱北過關，澳門海關都唔知點做嘢，已經好多人，但又只開好少 counter，結果攪咗個半鐘先過到關。
終於到了選校最後一個階段，亦係最重要嘅階段，填三十間中學，真係有難度，老師話如果擺某間第一，另一間就唔可以擺第二，一陣又話呢間同嗰間，唔可以一齊放在五名內，真係好頭痕，不過唔填哂又好似唔穩陣，結果我地好乖，真係填哂三十間。
好彩今次家姐考試都幾好，三次呈分試後，平均成績都 OK，可以選嘅學校都算多，最後我地決定堅持協恩，雖然有少少險，但统一派位階段，存有抽獎成份，所以都願意博一博！
聽日交埋 form後 ，就大功告成，一切都要等七月五号放榜，才知下一步怎做了！
一年前 Janet book 咗公司間渡假屋，叫埋我地成班去，入 camp 嗰日阿妹發燒，雖然佢照去，但就無得出去玩，無去到張保仔洞，家姐喺佢面前講話好好玩，佢就好唔開心，Janet 姨姨就應承會 book 多一次，再同阿妹去過。
結果一年後，真係 book 到，阿妹就好開心，一個星期前，已經擔心自己會病，驚又唔去得。
到了星期六，出發喇！
去到門口已經好開心！
一入屋已經玩康樂棋。
到了夜晚，梗係 BBQ 啦！趁仲有日光，影相先！
最驚喜係Mo Mo，山長水遠都入嚟 BBQ，佢真係入嚟個幾鐘，就出返去，實在太感動喇！
今次再嚟長洲嘅主要目標，係帶阿妹去張仔洞，但係星期六晚，天文台已預測，星期日會有雷暴，我地同阿妹講，要有心理準備去唔到，佢好失望呀！
星期日一早起身，雖然天陰陰，但未落雨，我地決定照去。先去飲早茶。
之後，就出發去張保仔洞喇！
我怕黑無入去，爸爸就陪兩位小姐入，阿妹好開心，仲要求入去多一次！
大合照
行完張保仔見時間尚早，就唔撘船，慢慢行返去！
原來呢日係天后誕，週圍都有舞師。
咁啱仲有龍舟比賽。
見到呢度啲救護車好迷你，好得意呀！
睇戲見得多"方便醫院"，原來真係有喎！
全日妹妹都好開心，有得玩有得食。食完 lunch，就返渡假屋沖涼，準備執嘢走喇！
當我地沖哂涼攪掂想走時，出面風雲變色，個天三點半，黑到好似六、七點，我地急急切退，我地算好彩，行完哂啲斜路，先開始下大雨，幾驚趕唔到船呀，又好運地 just make，撘到四點班快船，真係要感謝主，啲雨等我地去哂要去嘅地方先落，實在感恩！
美中不足係兩次 camp 都唔齊人，希望下次可以啦！
