踏入 2011 年開始，我嘅生活就充滿了忙、忙、忙，先係應付妹妹考試，之後又要為家姐交 form 嘅事張羅，終於星期二交哂啲 form ，琴日好好休息了一日，今日又趁去電髮閃了出去行吓，當係放假啦！聽日又要繼續努力，仲有好多 plan 咗要做嘅事未做！相信下星期，仍然係忙、忙、忙！
2011年1月18日 星期二
小六生血淚史 - 自行分配階段
經過上星期嘅家長會，和班主任及副校傾完，我地最終次決定，維持我地先前嘅決定，雖然機會渺忙，但都想試吓！
整理資料、填表，仲有度好份 portfolio點做，忙了幾個夜晚。
因為學校有指定要求，所以要出動爸爸，用平時交 presentation 嘅技能。
今日終於攪掂哂交得表，總算還了件心事喇！
2011年1月11日 星期二
挑戰
專家一早預測，今年嘅冬天會好凍，之前都半信半疑，結果真係靈驗了，全世界有很多地方都落大雪，而香港由十二月中開始，天氣就持續轉冷，呢個幾星期，天氣更加是寒冷，而家得十度，聽朝仲得七度。
個天好似真係要比個考驗給我，新嘅轉變對我來說，已經唔容易，還要加埋天氣寒冷，是一個更大嘅挑戰，或者呢啲就係上天刻意安排給我嘅試練！
有人覺得我嘅決定好無喂，係自己攞來，坦白講，我到呢一刻都無後悔，而且反而覺得少咗份憂心，多了一份自在，只係很忙很忙，需要一段時間適應，我有信心會挑戰成功！
我記得三年前嘅冬天又係好凍，嗰年啱啱唔洗返工，覺得O甘嘅天氣先係冬天，好鐘意呢種感覺，雖然而家辛苦啲，但我仍然喜愛冬天呢種 feel ！
2011年1月8日 星期六
2011年1月6日 星期四
聖誕Camp @曹公潭
已經連繼第三年，聖誕節正日同佢地一齊過，今年無去大陸，我地 book 咗曹公潭住一晚。
由於很不幸我張相機咭壞了，大部分啲相都係借用佢地嗰啲。
下午兩點到達營地，就去聽簡介會，之後就上房，每人要自己鋪床單，入被袋，可惜全部啲相喺我張唔度。
第一樣去玩嘅活動係滾軸溜冰，兩姊妹第一次玩覺得好新奇。
之後玩射箭，我射中中間架，不過啲相無咗喳！
嗰晚其實好凍，我地仲喺大帽山山腳，又風又雨，仲凍過嗰次去露營。
去 camp, 夜晚梗係喺房玩啦！
小朋友仲有禮物收。
第二朝一早去玩期待已久嘅攀石。
家姐都夠胆玩喎！
阿妹最鍾意玩呢啲玩意。
食埋中午飯先走，兩日一夜嘅宿營又結束了！
2011年1月5日 星期三
2010年回顧
因為近日太忙，呢篇 blog 要等到今日先出。
2010年係吃、喝、玩、樂嘅一年，我年頭定嘅目標都達到哂
。今年外遊了三次，年頭時兩公婆和 Eva , Kenny 去過泰國，暑假時又同佢地去澳門，而最開心就係四月和朋友去日本，呢三個 trips 都玩得好開心。
2010年最大嘅發現係，原來我鐘意整西餐，自後年頭學法國菜開始，對煮西餐嘅興趣一發不可收拾，除了法國菜，我仲學了意大利菜，我不但對煮西餐有興趣，對週邊嘅煲呀、餐具呀、甚至廚房用品都十分興趣，而家我最鍾意逛十元店、citysuper，fransfrans 等。
煮嘢食可以訓練我嘅耐性和冷靜，以前我最怕砌嘢，而家又覺得OK喎！我覺得煮嘢比家人、朋友食，雖然過程辛苦，但如果煮得成功，佢地又鐘意食，就會有好大嘅滿足感，今年，我會繼續學啲新菜式，繼續煮嘢同人分享。
2011係充滿挑戰嘅一年，我最大嘅心願都係喺兩姊妹度：家姐派到心儀嘅中學，阿妹五年班繼續留喺精英班，O甘就 perfect喇!
另外，今年暑假嘅日本之旅，希望可以成行啦！
訂閱：
文章 (Atom)