老富昌 again

昨天又約了大少奶和 Amy 出來，今次我提議去老富昌，因為我有 coupon ,（ haha C9 心態） 三個女人一個墟，一見面就講、講、講，我都冇咩影食物。 呢度普遍午餐都唔貴，大約$ 7X -9X ,我地選了有頭盤、甜品既豐富午餐 set , 價錢$14X , 冇影到主菜，我影了頭盤和甜品。

頭盤幾精緻，上兩次夜晚來，我覚得個湯唔得，反而今次個湯又幾好味。

甜品係拼盆上，唔錯！ 呢度環境舒服，我地傾到成三點先走！

之後，一齊行了一陣shopping , 再之後去飲杯咖啡再吹，超正！ 約了十二月中，來過 Per Christmas Party , 到時又傾過食過！

陽光姊妹淘

呢套戲上畫時，已經想約班女性朋友一齊看，可惜當時這套戲，上了不久就落畫。後來朋友買了DVD, 睇完話好正，於是就借了回來，今日剛睇完，覚得真係超正！

原以為只係講一班女生，一起成長既回憶。估唔到係一套類似那些年這樣，由中年回憶學生時代發生既事，現代與回憶交替，只是今次唔係講初戀，係講友情，女生與女生既姊妹情。 主角因偶遇高中時代好友，得知好友病重，不久人世，好友既遺願係想見返以前一班好姊妹，於是主角就千方百計找她們出來，過程中令主角勾起了很多回憶，以前既好姊妹，今天各有遭遇。

全片用了一種輕鬆、略帶攪笑既手法去拍，但又能帶出一種中年人既遺憾！整套戲悲中有喜，笑中有淚，令人難忘！
 
我覺得最感人有兩幕：一幕係主角睇返以前拍下既影片，每個人對住鏡頭，向長大後既自己，說出自己對長大後的期望，對應返各人現在既遭遇，十分希虛！另一場是 ending ，在𩆜堂上律師宣布遺囑時，死了既好友根據各人需要而分配，大家對忙友死了也事事為她們安排而感動，到最後大家一齊跳舞，都是悲中有喜，感受甚深！

我相信呢套戲好啱女生看，那些年既姊妹情，我相信每個女生都擁有過，只是長大後，被身邊其他事情蓋過了，遺忘了吧！

我的夢想〜 正在邁向中......

小時候沒有太多夢想，從不幻想自己會成為，什麼醫生、律師等專業人士，又沒有期望自己，嫁入豪門，做少奶奶等，
只是像普通人一般，跟隨人生的次序，讀書、出來做事、拍拖、結婚、生仔，過著平凡的生活。


曾幾何時，我為自己沒有考上大學而感覺到遺憾，擁有一個學位，就成了我一個夢想！但一個既要返工、又生了小孩的婦人， 還有時間進修嗎？幸好，在生下大女後不久，不知從那兒來的一份決心，我報讀了公開大學的遙距課程，心裡想：反正時間都係咁過去，又唔係急，可以慢慢讀，就當還自己一個心願！ 結果用了九年時間，由細女出世、家庭和事業超繁忙的好幾 年，到身體出現毛病，再之後成為全職媽媽，好不容易，2009年終於夢想成真，完成大學學位課程，第一次感覺到夢想成真的興奮！
 

當夢想實現了，情緒突然有點失落，人生好像缺乏了一些方向，經過一段時間尋求，我又找到了方向。 我好感恩在五年前， 當我身體出現了一些問題時，我先生可以給我一個很大的支持，讓我全職當一個媽媽來，全心全意去照顧兩位女兒，起初我是有點 兒擔心，留在家中，會否很悶，因為我自少就好怕悶，一分工接一分工，從沒間斷，突然停下來，真係驚適應唔到！結果相反，我適應到不得了，可能而家資訊發達，上網能知天下事，每天都充實地過下來！


這些日子𥚃，讓我有時間去思考人生，慢慢地發覺，原來以前所過的生活，不是自己想要的，又發現了自己一些興趣，從而努力學習， 在生活中學懂享受生活，了解自己不喜愛受束縛，這不就是我夢想要的生活嗎？好感謝主，能使我有這福氣！

下年妹妹也升中了， 係時候開始思想一下未來，近來腦袋裡出現了一些想法，在未來這一年，正好給我一些時間作準備，如果成事，那將會是一個更圓滿的夢想生活！

一個快樂的家庭，一個每天可以為夢想努力的人生，那就是我的夢想！

生活組織術

自從冇工人姐姐幫手後，家中所有清潔、執拾就由我一人負責，雖然我唔係一個潔癖既人，但我亦唔喜愛屋企唔整齊，不過，如果要我每天花很多時間在家務上，我又唔想，所以我不斷在想，又什麼方法去減省做家務既時間，而屋企又可以 keep 得整齊、清潔。 最近行書店，買了以下本書，令我有很大既啓發！

 

呢本書介紹了一個好得意既 term ： 生活組織術 這本書要介紹一個理念：不僅要人扔掉東西、解決收納問題，更幫助人們重新正視自己的生活方式和人生職業，生活組織的觀點和方法，對於時間的整理也很有效果。生活組織術除了讓人清楚自己的價值觀、描繪理想的生活，也很重視付諸行動這件事。這樣，生活就會變得更輕鬆、更快樂，這正是我追求既生活態度。
 
原來而家喺日本，新興了一個職業：生活組織師，主要幫助為收拾所苦的人整理思緒，以及為對方量身訂做適合的收拾、整理空間的方法，與對方一同打造舒適的生活。其實，日本人比人既印象，都係整齊，估唔到連收拾，都是一門學問，還可以成就為一種職業！

香港人生活繁忙，邊有時間去硏究啲咁既嘢，不過其實諗深一層，香港樓價咁貴，大部份香港人既屋企，都是蝸居，沒有太多地方收納東西，如果我地可以善用空間，懂得組織，既可省時間執拾，又可打造一個雖然地方少，但整齊舒服既家！ 可惜而家市面上，関於收納、執拾既書，只有日本、台灣既翻譯本，暫時還沒有本地出版，我買了幾本來鑽研中，希望從自己屋企開始，實踐下利用這種生活組織術，看看在香港呢個地方是否可行，我會繼續在此 update 和分享！
 
另一本正在睇......

日式咖哩飯

材料： 無骨雞腿肉 〜 紅蘿蔔〜 薯仔〜洋蔥〜日本咖哩磚4 塊〜水4 杯做法： 


1  雞肉去皮切成一口大小，用少少鹽、酒、胡椒粉醃15 分鐘。洋蔥切絲，紅蘿蔔、薯仔切粒，薯仔要大粒少少，因薯仔快熟。

2 加油，先以中火再細火炒洋蔥至軟身。

3 加入雞肉再炒，開返大火，之後再加入紅蘿蔔炒，再加入薯仔，之後加水。

4 水滾之後隔起泡沫，先加入2粒咖哩磚煮熔，之後轉細火煮至紅蘿蔔腍身 （大約30分鐘，中間不時攪拌以免痴底），最後加入餘下2粒咖哩磚煮熔即可！


日本咖哩磚

 

此食譜來源於 blogger -Athena , 謝謝！

朋友仔生日飯@老富昌

好耐冇寫食評，但琴晩餐飯，令我很想推介和分享！ 間餐廳叫老富昌，個名幾朖，跟本聯想唔到係食法國菜，佢有英文名，叫 Le Fauchon ，喺尖沙咀新港中心，佢個位都幾隱蔽，環境都唔錯，幾高格調，靜靜地，啱唒情侶談心，或三五知己傾心事！

 
唔好睇佢咁有情調，又食法國菜，價錢一定很貴！錯喇！價錢相對來說，唔算太貴，話唒食法國菜，又有咁好環境，佢 set dinner ,有兩款： $238 ，三道菜（湯、主菜、甜品），$268 四道菜（頭盤、湯、主菜、甜品），另有一些套餐，大約五、六佰元兩位，二佰幾三佰，有咁既質素，比起啲風 X 堂，一個 dinner 都要佰幾元,值好多! 所以我先咁推介！
 
講番食物，都唔差，當然你唔可以同酒店水準比，但起碼你食到有 heart ，味道好，賣相亦晤求其!

我和朋友都要了四道菜，頭盤：鵝肝醬拼多士，鵝肝味濃，正！

湯：龍蝦湯，個湯比較稀，四道菜之中，略差！

主菜：我要了法式鴨，幾脆又唔乾身！

朋友要了羊，佢話都掂!

甜品：我要了焦糖澄蛋，好好味！聽人講呢度甜品好出名，我見隔離枱要心太軟，好似好掂！但呢款，要另加$25 

朋友要雪糕芝士餅，佢話勁正！

我即時入了會，雖然要比$200 ，但送番$300 現金coupon , 兩張$50 for lunch , 兩張$100  for dinner , 兩個月之內用完，會員有九折，如果晩餐在八時前埋單，有八折，生日有蛋糕送，都 OK 架！

六年班生涯

由細到大，阿妹既小學生涯，都比家姐過得比較輕鬆，雖然同一間學校，功課量應該差不多，但又唔知點解，阿妹真係做得快手，成日餘下很多悠閒時間。

不過，今年踏入六年班，情況就開始有所改變，阿妹學校功課，明顯多了，加上上次考呈分試，考得唔好，我集中火力要谷佢，所以一開學，就已經每晚同佢溫習，又要佢做額外練習，加上今年請多一位中文補習姐姐，教佢中文作文，每星期交一篇文比姐姐，佢忙了很多，而家佢既課外活動時間如下：
 
星期一 、二、五 4：30- 6：30 補習社

星期三 5：00 - 7：00 英文補習

星期四 4：00 - 5：00 公民數 6：00- 7：30 中文補習

星期六 11：00-12：30 藝術體操 2：30 - 4：30 英文補習

星期日 10：00 12：30 返教會 3：00 - 4；30 油畫班

真係一星期七日，日日 full 唒，原先我唔想佢星期日學油畫，但阿妹好想學，佢話日日都係補習，學油畫係興趣，既然佢都唔怕辛苦，咁就比佢學啦！ 加埋溫習，其實真正休息既時間真係唔多，唉！不過六年班生涯係咁架喇！呢一年係辛苦啲！努力啦！

一瞬間

*一瞬間，太多東西要講，可惜即將在各一方，只好深深把這刻盡凝望！* 一瞬間，可以改變好大，由原先快樂既假期，變成了永遠忘不了悲痛既一天！ 今年中秋和國慶連埋一齊，所以造就了四日長假期，原本大家都開開心心，街上充滿著歡樂氣氛！今年中秋，並沒有安排什麼節目，只是一家人在家，吃過做節飯後，就和兩位小姐落樓下公園，行了個圈，玩下管光棒，一家人簡簡單單過了一夜！ 國慶假期日間，也沒有什麼節目，兩姊妹在家做功課、溫習，到了晩上就有特別節目，一家去尖沙咀看煙花，老實講，我咁大個人，第一次去尖沙咀現場看煙花，我最怕迫，幸好今次在酒店戶外bar 看，唔洗迫又有得坐有得食，於是就來看看吧! 六點幾到，食下野、玩下手機，好快就等到九點放煙花！街上企滿人，好熱鬧，大家都睇得好投入、好開心，一家人、朋友聚在一起，睇住頭頂燦爛既煙花，真是人生一大樂事！點想到，同一天空下，喺同一個城市，這麼近，卻那麼遠，我們呢邊，歡天喜地，他們那邊卻經歷生死，原本也是高高興興地去看煙花，怎料一瞬間，變成災難，家人生離別，一瞬間，什麼都改變，他們是多麼恐懼、悲傷！ 後知後覺既我，看完煙花回家看新聞，還以為是普通撞船（撞下船頭嗰種），就沒有理會，那料，第二朝早上，一開收音機，聽到什麼海難、港殤，就知大件事，整日電視、收音機，都不斷報導，死亡人數亦不斷上升，28 、36、37 、38 ，聽得令人心酸！ 以後，每年既國慶，就是遇難者既死忌！多悲哀！雖說而家意外發生了，什麼都改變不來，我們能做的，只有希望死者安息，傷者早日康復，在生脫險者繼續好好生活，早日忘記悲痛，重回正常生活，社會仲有好多人為你們打氣、祈禱，願主保守這班經歷慘劇既受害者，和他們既家人！阿門！