家姐考完呈分試後，展開了一連串嘅吃、喝、玩、樂。
11-12-2010 (星期六) ~~~ BBQ @碧堤
13-12-2010 (星期一)~~~ 打邊爐@小肥羊
15-12-2010 (星期三) ~~~ 夜晚去覆診，之後約咗 Hee Hee 和 Emily 去和民食飯。
16-12-2010 (星期四) ~~~ 呢日超凍，下午都只係得 7.5 度，約咗 Hee Hee 和 Emily 去飲茶，之後行了一陣，就回家了。夜晚去咗銅鑼灣上 iPhone training，提早個幾鐘去到銅鑼灣行吓，九點幾上完堂，諗住求其食啲嘢返屋企，點知查生 call 話剛剛落機，等埋佢返美孚打邊爐，O甘凍(得7度)打邊爐都好，O甘夜仲好抵，$143咋！
19-12-2010 (星期五) ~~~ 朝早去咗吉之島買聖誕禮物。
18-12-2010 ( 星期六) ~~~下午和Eva 一齊上" I love kitchen" cooking class ，幾好架！
夜晚，又打邊爐@ Winnie 家
一個星期又BBQ，又打咗三次邊爐，臨別秋波，last 個星期真係用盡哂，勁呀！
星期六上咗 "I love kitchen"攪嘅一個 cooking class，嘩！人地呢啲真係 pro，同喺工聯會學嘅差好遠，呢啲先係煮西餐嘛！
呢嗰蕉糖蘋果杯，好易煮架！會試。
啲蘋果好好味，呢味仲好有聖誕 feel，嚟緊開 party 會試。
阿 sir 把刀好大，好勁！
南瓜沙律，都好易整。
呢一堂 cooking class $200 兩個鐘，學完可以攞返$200嘅廚房用品，好抵架！下個 target係去 Sogo Club 學。
聽日家姐就考第二次嘅呈分試，呢兩日都留喺屋企閉關温書。雖然我明白唔可以迫得家姐O甘緊，但佢有時慢吞吞嘅態度，真係令我好火！
相對上一次嘅呈分試，今次我更加緊張，可能聽完啲中一簡介會，了解得愈多，就愈死！加上近期被某事煩着(雖然表面上，已經解決咗，但實際上仲要忍多幾個星期)，心情大受影響。而家我唯有不斷話比自己聽，咩都唔好理，過咗呢四日至算啦！
其實，原來幫人温書，仲難過自己温，唉！唯有盡力而為啦！
今日約咗從未見過面嘅 blog 友 Amy，同埋大少奶喺Tubino 食 lunch。雖然第一次見 Amy，但係都覺得好親切，好似識咗好耐，可能大家都有個讀六年班嘅女，話題就更多。
嚟過呢度第三次，第一次影到間餐廳全景。
今日啲相用部新 iPhone 影，唔知是否未習慣部機，啲相影出來麻麻地，大少奶唔好意思，要借用你啲相。
呢杯餐前飲品，係同大少奶嚟先送架！幾好飲喎！
呢幅我用 iPhone 影，係唔係同大少奶影嗰啲差好遠呢？
今日餐湯: 粟米海鮮湯，好味！
我叫嘅豬扒配鵝肝醬汁，個豬扒做得好出色，唔會鞋口。
大少奶叫嘅羊。
Amy 叫嘅鱸魚。
同大少奶來，連甜點都升級，呢個朱古力mousse，係要凍食，我唔太愛甜品，但我都覺得呢個好掂。
蘋果tart，呢個反而普通啲。
心太軟，I like it!
跟餐嘅甜點都唔錯架！
我杯咖啡好靚架！
餐飯食到三點幾，但都好似傾唔夠喉，呢幾日心情麻麻地，但同佢地食完飯後，心情好返好多喇！好期待下一次啊！
臨走見到個紫色聖誕老人好靚。
終於完成了份 portfolio，呢份只係 standard 嗰份，至於每間學校有每間嘅要求，到時一月交表再執，而家要做只係打好哂啲資料，整理好啲 cert 呀、獎狀等。
攪掂份 portfolio ，暫時應該可以停吓喇！
琴日去完協恩中學嘅中一簡介會，感覺非常好。雖然佢地已經係一間好出名嘅學校，但佢地仲好有心機辦呢次簡介會，令人感覺佢地的而且確係用個心去做，唔似一啲以為自己係 brand one 學校，就唔需要再招攬學生，簡介會就求其了事。
校長講佢地係一間注重全人發展嘅中學，其實我聽過好多學校，都係用此為重點，但實際有幾多間真係做到，我相信協恩一定做到，從校長嘅講話，感受到呢間學校唔係只着重成績，佢地更着重培養學生做事嘅態度，注重團隊精神，對學生成長好有幫助，成績好嘅學校好多，但成績好而又用心辦學嘅就很難求，協恩絕對是其中一間。
校舍雖然舊啲，但環境很清靜，好鍾意呢間教堂，好似九姑娘和劉醒成日去嗰間。
睇完協恩嘅感覺，和幾年前睇完馬小回來一樣，真係好鍾意呢間學校，亦都覺得好適合家姐，不過好學校就多人爭，希望和考馬小一樣，最後成功就好了！
由現在開始，我會每天禱告，願主保守家姐，可以有機會在這校讀書，我相信主會聽到我嘅祈求，為家姐安排好，感謝主！
踏入十一月，開始為升中作準備。剛開完家長會，又去了一些學校嘅簡介會，取了很多單張，加上買了兩本天書 ，需要整理吓啲資科，所畏:[知己知比，百戰百勝]，選中學之前，一定要做足功課，看清楚、想清楚，所以做家長嘅都會好忙碌架！
琴日一早八時，一家四口就到達學校，参加九龍城區攪嘅中學巡禮。其實上年已經参加過，今年想睇埋迦密和旅港，所以再参加多一次，今年帶埋妹妹一齊來，等佢聽埋，下年就唔再参加，因為一日去八間，真係好累！
今年比上年好，家姐啲好朋友一齊來，佢地好似旅行O甘，玩足全日，而我都無O甘悶，可以同佢地啲媽咪傾計，大家交換吓選校嘅心德。
