小六生血淚史 - 開始篇

呢篇網誌係應家姐嘅要求寫。話說開學兩個月，頭嗰個零月啲功課量都仲 OK，呢兩個星期就開始多了，可能要趕住教啲書，十一月頭測驗，十二月頭又考呈分試，啲老師梗係 嗱嗱臨教哂啲書，然後狂做練習啦！每日仲要做公民數、英文補習姐姐嘅功課、學林中文嘅練習等，每晚都做到九點幾，唔可以維持九點半瞓嘅習慣。

家姐每天都投訴，點解O甘多功課，點解要補習，甚多怨言...... 佢又知自己六年班要博，但又唔肯付出，唔明成功需苦幹嘅道理，唉！你估我想補O甘多習架！我錢多咩！唔補習淨靠温學校啲作業、工作紙，肯定死得啦！而家啲學校考試會考 extra 嘅嘢，佢地 expect學生喺出面學， 於是個個都喺出面補習，如果你唔補習，OK，你會合格，但唔會高分，人人都想考間好中學，個個就要攞高分囉！

家裡有個小六生，全家全年都一齊受壓。我家有個小六生，仲要係一個極度固執(亞士保加)嘅，未來呢年真係唔知點捱，正確來講，應該係小六生全家血淚史先啱！