法式王汁

學完法國菜成個月，終於啲起心肝試煮吓學過嘅嘢。第一樣要整嘅係個王汁，因為法國菜有好多食物，都要配呢個汁來食。不過要煮呢個汁都幾煩，阿 sir 話要分三日煮，每日煲一個鐘，我就無跟足，分開兩日煮就算。

要煮呢個汁，先要預備以下材料:

牛骨兩斤和一啲牛嘅下欄嘢，洋葱、西芹、甘荀，茄羔、蕃茜、香葉、 Rosemary、黑椒粒

先將牛骨和下欄嘢放在焗爐用250度低面火焗15分鐘，切記唔好洗啲骨

再將洋葱、西芹、甘荀切粒

做法:

1.  用牛油慢火炒香洋葱、西芹、甘荀，加入牛骨，放入蕃茜、香葉、 Rosemary、黑椒粒，再加入茄羔再炒，然後加水煲滾後，慢火煲三個鐘 (分三日，每日煲一個鐘更佳)，煮至濃，隔渣。

2.  隔渣後嘅汁，再煮滾，大火加入少許 [麵撈] 調至糊狀，再加入白蘭地、紅洒及糖和鹽，便成。

附註:

[麵撈] 係牛油加麵粉，先將牛油用慢火煮溶，下麵粉慢慢撈混炒香

第一次整嘅[麵撈] ，太希喇！

睇吓！阿 sir 嗰啲，成舊吖嗎，今次我失敗了！

經過兩日煮成嘅王汁

個樣都有八成似阿 sir 整嗰啲，味道梗係差啲，只有五、六成喳！最初我以為今次實失敗，好在後來又想到方法保救，試過呢次自己煮，啲 steps 清晰好多，下次做一定會好好多！

雖然唔係好成功，但O甘複雜先煮成，就唔好浪費，照 keep 來煮其他食物喇！阿 sir 話放喺冰箱可以 keep 好耐架！