考試前準備

大家唔好以為我又考試，唔係我，係兩位小姐。或者你會問，唔係自己考試，點解係我準備呢？都係嗰句，而家呢個年代，小朋友讀書，等如家長也要陪讀，其實我都唔想咁緊張，不過唔理佢地，又好似揾佢地嘅前途靠飛咁！

今次想分享一吓，佢地每次考試前，我會準備啲咩！

通常出咗考試範圍後，我就會 review 吓個範圍先，費事讀錯書嘛，然後會攞哂啲補充練習(中英數)出來，選定邊啲要考嘅，就一份份夾好，如果有啲認為重要，要做多次嘅就 copy 多份，然後就一份份放在一起，準備佢地温習備用。

至於常識科，我通常會喺開學前，將全部作業(空白) copy 一次，考試前再比佢地做多次。有時有啲作業唔記得事先 copy，又或者係一啲小測卷、測驗卷，想佢地做多次，就要做吓啲手作仔喇！

首先將作業 copy 一次，然後用塗改帶塗哂啲答案，之後再 copy 。

其實幾年前，我仲會自己出埋卷，或者做埋筆記(常識科)添，但由上年開始，我開始放手叫家姐自己做筆記，而今年連妹妹，我都教佢自己做喇！

我成日都信，[工欲善其事，必先利其器]，温書係要有準備、有方法，唔係亂來死讀就得，希望由細教識佢地呢個道理，之後大個用得著啦！