老公正日生日

今年查生生日，可以玩足三日，實在好開心！琴日正日，朝早去麥記吃個豐富早餐後，就落屋企樓下揼骨，本來查生想返大陸揼，但我話樓下有間按摩店，唔洗山長水遠返大陸，雖然貴啲，但而家人仔都唔平，慳番時間同交通費都喺番到啦！我地揼咗一 part 身，和一 part 腳，成個人鬆唒，前幾日條頸痛都鬆埋。正呀！

之後返屋企 hea 吓，又出動去睇四點場，我地睇 "倩女幽魂"，又比想像中好喎！

晚飯喺尖沙咀嘅 Spasso，係朋友介紹，話好有 feel 喎！本來我 book 咗 indoor，因為驚熱，但琴晚天氣好好，有啲風，好舒服，所以 request 轉 outdoor。

呢間餐廳係食意大利嘢，呢嘢食一般啦，但 outdoor，十分有 feel!

食完飯，去咗香格里拉飲紅洒。