國民教育

最近城中閙得熱控控既話題，一定係國民教育。首先，我在此聲明，以下只係我個人感受，或者好多人會唔同意，但我只是想表達吓我個人感受！

由開始起，我都唔係好留意這件事件，直至今個星期開学，事件發展到有人絕食，我就開始関注多了。其實，呢件事上，我一直抱觀望態度，雖然我都係身為人母，但老實講，我唔係好激動，我甚至預了阿妹間学校，會今年開始，因為佢讀既係官校。

咁點解我唔太擔心呢？係因為我都認同身為中國人，係需要認識和了解多啲祖國既事情，世界上有好多地方，都有國民教育，點解其他地方既人，又接受得到呢？我估主要係大多香港人，仲未太接受自己係中國人，對中央內部既政策，都好驚！一聽到中央下既決策，就必定存有負面情緒。我咁講，可能好多人反對！我想講，大家首先要冷靜，為何聽到國民教育，就等如洗腦？什麼叫國民教育？係教一個人，對自己祖國有一定既認識，作為一個國民，對自己國家應要付既責任，但點解所有人，只係針對課程，講唔講六四真相，講唔講李旺陽事件，又話會天天叫口號，乜乜乜萬歲！但事實，到今日為止，我地連本書都未見過，只係見到啲概覧 - 要鼓勵學生有愛國既情懷，就話對學生洗腦，會唔會武斷咗啲呢！我唔係幫政府，我都覺得這個決䇿唔夠透明度，課程簡介太概括，應該清楚列明全套課程，消除家長既疑慮。家長之所以咁大反應，係因為唔了解，唔清晰，另外，加上一些人有心既推動，明知香港家長，最著緊我地既下一代，就利用這點，將成件事政治化！

我贊成唔可以事事亦來順受，有意見係要行出來表達，當年23條要立法，幾十萬市民上街遊行，而我亦身在其中，這是正確表示不滿既行為，今日居然要行到絶食呢一部，實在過激！之前，有個绝食学生，对住电視鏡頭前，好激動咁叫梁振英立即撤銷國民教育，佢用生命來威逼，咁樣做只会返唔到轉頭，如果因為你咁做，政府既一個政策就取消，將來所有人，一唔高興又对另一啲事，又用绝食來相迫，咁社會仲有規律？

我地做家長既，當然唔想下一代被洗腦，但今日一啲家長，又教自己啲小朋友，做些咁激既行為，聽信一些人既推動，呢啲唔係另一種洗腦嗎？將來下一代，一有不滿，又用绝食呢招！

唉！其實我地身處香港，已經係好幸福，就算回歸後，我地都仍然係言論自由，我地係應該好好珍惜，記住幸福唔係必然！試想想生活在中國大陸既人，就算而家经濟幾咁起飛，但佢地都冇我地咁自由，有好多事都冇得選擇，只有默默接受！

有時我覺得，我地呢一代既家長，太保護下一代，其實我地係應該相信，佢地係有能力、有智慧，去分析咩係岩，咩係錯，就算真係要洗你腦，你係唔係咁易被人洗，而家資訊咁發達，一開电腦就能知天下事，甚至所有歷史真相，都冇可能隱藏，加上我地做父母，亦會喺身邊加以教導，所以，我地唔好比人利用成為政治棋子，冷靜啲，要反對，都唔好做些激進行為，和平咁提出意見！