試用期

唔經唔覺就過咗三個月，呢段日子比我想像中過得輕鬆，無姐姐嘅日子，都唔係太辛苦，只係有時少啲自由。

坦白講，當初作出呢個決定，都有少少擔心，驚自己應付唔到，不過，而家過咗三個月，又覺得OK喎！

呢份工嘅試用期，我當過咗喇！

放監

今日家姐考完試，等陣過去學校接佢放學，帶佢去食嘢同行吓街，當係獎勵佢考完試啦！至於自己，我獎勵自己去街街，約咗 friend 食晚飯，諗吓都有成個月無出夜街喇，來緊兩日都有街街去，真開心！

而家出夜街，真係無以前O甘方便，所以每次都會好珍惜！

大功告成

家姐嘅考試，考埋聽日就考完，可以鬆一口氣！三個呈分試終於考哂，只要四月中，填埋大抽獎份表，升中要做、要盡力嘅都做哂，總算大功告成！

今日聽到婆婆講，佢一個舊同事(我都識，同我差唔多大)，佢個女同家姐O甘大，今年都係六年級，九月升中一，佢居然放棄自行分配呢個階段，唔同個女報學校，原因係費事攪O甘多嘢，唔想填表和影印喎！O甘都得！邊有阿媽惰成O甘，亞女前途都唔理，好彩佢個女成績好好，大抽獎應該會派得幾好，佢好命，佢仲有個仔，以前升中都係靠大抽獎，入到元朗一間出名中學，佢從來唔理仔女功課，世事就是如此配撘！雖然係人地嘅事，唔關我事，不過真係有啲睇唔過眼，點解而家仲有啲O甘嘅父母？

小六生血淚史 - 最後一次呈分試

呢次呈分試，出來嘅成績主要係用來大抽獎，因為自行分配嗰兩間，都預咗唔得，所以今次嘅成績就好緊要。都係嗰句，你急佢唔急，佢唔係唔 care ，但見佢温習時又奶奶閒，呢幾日，我都就哂佢，好多時忍住度氣，唔同佢嘈！只要考埋今次，升中要盡嘅力，都好似盡哂，跟住要做嘅，就係睇彩數喇！

小六生血淚史 - 伊利沙佰 Interview

終於收到信有得 Interview，雖然唔係一定得，但有個機會面試，總好過無。六佰幾人報，二佰幾人 In，最後選四十一個，都幾渺茫嫁！不過，呢間係聯繫中學，大抽獎仲有機會！

開心大聚會 - Freddy 婚宴

上星期五去咗 Freddy 個婚宴，原本以為唔係擺酒，只係朋友食餐飯，後來知佢擺九圍，但估唔到差唔多全部都係電子界嘅人，唔係舊同事就係行家，見番好多好耐無見(1X 年無見都有)嘅舊同事。

嗰晚真係好熱閙！

成晚好像回到當年... 甚麼金寶輪呀、CACL、以前 marketing 到以前嘅 Future 都喺度。O甘難得嘅機會，梗係要影多啲相啦！

呢幅相勁似以前Annual Dinner!

嘩！連譚生都請到，Freddy 真係勁！

仲有抽獎同遊戲玩，係一個好有氣氛嘅婚宴。

賜哥頒獎。

賭馬遊戲。

好認真，真係有得睇住跑。

之後，鬥快飲啤酒。

除了玩，嗰晚都食得幾好喎！

有鮑魚食！

好大隻花膠！

呢個泡飯好好味！

甜品都好特別， 估吓係嘜？

係好健康嘅菜汁呀！

嗰晚真係好開心！咁人齊，機會十分難得，雖然而家退出了電子界，但見番O甘多舊同事，真係好有親切感！

冷靜

自從上星期五日本大地震，繼而引發嘅核輻射，新聞就不停報道，唔好嘅消息末完末了，我覺得日本人憂心是應該的，但身在遠處嘅香港人，每日都製造一些謠言，呢日排隊搶奶粉，第二日就搶碘片呀、碘洒呀，今日仲離譜，搶購食鹽和雞粉，話可以防輻射喎！真係傻傻地！攪到好似末日O甘，外國人睇新聞，以為災區係香港添！

唔該香港人唔好咩都搶，又喺網度傳埋啲嚇人訊息，自亂陣脚，你睇日本人雖然面對O甘大嘅災難，佢地係好擔心，但佢地仲好有秩序，唔會搶呢樣搶嗰樣，保持冷靜，真係值得我們學習！

其實今次日本地震，雖然好似離我地好遠，但對每一個香港人，唔多唔少都有影響，本來諗住今年暑假，等家姐放榜後，一家人去日本玩，我仲叫埋兩個朋友，總共三個家庭一齊去，正當大家期待着嘅時候，發生了呢件事，我地都好失望，不過唔緊要啦，唔去日本，去第二度都得，最重要係大家齊齊整整，平平安安！

烹任班 -法國菜 (2)- 第一堂

今個月又開始上番烹任班，今次學法國菜 (2)，雖然無得實習，但跟番以前個阿 Sir，相比之前實習班嗰個，好十萬九千倍！

每次學兩味菜式，呢堂學嘅兩樣，我都有試整。

凱撒沙律，我終於學識整個汁喇！

呢碟阿 Sir 整。

呢盆我整嘅。

凱撒沙律醬:

材料:      蛋黄                              2隻                       

              法式芥末醬                  10亳升

              義大利香醋                  30毫升                  

              蛋黄 醬                        250亳升

              巴馬芝士(磨碎)            40毫升                

              緹魚 (切細)                   3塊

              黑胡椒                          少許                    

              檸檬汁                          少許

製法:      1.   把蛋黄、芥末和醋攪打在一起。

              2.   慢慢加入蛋黄 醬 ，不停地攪拌，直至調味料均柔滑。

              3.   加入芝士、緹魚、檸檬汁 拌勻，調味便可。

 

香草蒜茸牛油焗青囗

 

阿 Sir 整嘅。

 

 

我整嘅

 

 

材料:     急凍青口                                牛油             35克

             乾蔥(切碎)                             蒜頭(切碎)    30克

             番西(切碎)   

 

蒜茸香草牛油:  

 

1.  把 蒜頭、乾蔥和番西，跟牛油拌在一起。

2.  把混合物放在保鮮紙上，捲起來，做成條狀，放於冰箱內冷

     藏 6小時。

 

 

製法:  

                

 1.  放乾蔥碎、蒜頭、白酒和檸檬汁入一煲水煮滾，加入青口一會即起  

                                

 2.  把青口放在烤盤，每隻青口放一塊蒜茸香草牛油，用面火(250度)焗 5分鐘。   

                              

             

家姐12歲生日會

講番上個星期日，家姐十二歲正日生日，喺屋企開生日會。

原先想訂 3D蛋糕，點知一個星期前訂都話無，於是訂番雪糕蛋糕，今次因為無整其他嘢食，所以訂咗三磅，個蛋糕好好味呀！

開生日會，幾個細路見面，梗係打 Wi 啦！

今次仲玩埋有益遊戲添！

話O甘快家姐就十二歲喇！

今年無喺屋企攪大食會，去咗酒樓食，小朋友一圍，

大人一圍，家姐話小朋友生日，去酒樓食好奇怪！

班細係唔係O甘餓呀！叫佢地飲杯都唔肯，嗱嗱聲夾雞食。

因為係星期日，第日要返學，所以唔可以玩太夜，食完飯就走，臨走佢地見到呢個欄，都玩一餐，仲依依不捨唔完走。

 

小六生血淚史 - 望信箱的日子

踏入三月，每天都開信箱，check 吓有沒有收到信，可惜直至今日都未收到，其實我地預咗協恩無 second in，而家盼望嘅都係伊沙啫，最怕係連 interview 嘅機會都無，自行分配呢個階段，就失敗了！

其實呢種等信，望信箱嘅日子，真係好折磨我地啲家長，呢排開始同阿女準備温習，考月尾最後一次嘅呈分試，已經頭痛，仲要日日等待，真係難頂！

不過，前日日本大地震，都比了我一些反思，人生有太多未知，一瞬間可以咩都無哂，讀邊間學校，神自有安排！

天災

琴日，日本發生 8.9 級大地震，大地震引發大海嘯，睇住電視新聞，海水冲向公路、機場和民居，有如電影明日之後，實在慘不忍睹！

每次有天災發生，我地都會驚覺自己生活喺香港有多幸福，地震、海嘯好似離我地好遠，但其實世事難料，天災係無法預料，可能真係有未日嘅一天，現今科技有幾先進，都無辦法準確地預測一些天災會發生，就算真係有一日做到，話比你聽邊年邊月邊日邊度有地震，世人又可以怎樣？整個國家嘅人，逃到那呢？知道了又如何？到時仲痛苦啦！我唔係要危言聳聽，我只係希望大家要珍惜現在，及時行樂，人生有太多未知......

近幾年有過很多次災難發生，儘管我地知道沒有什麼可以幫手，每次都會很心(up)，唯一可以做就是為他們祈禱，願主保守日本嘅死傷者不再增加，不要再有餘震，早日重建家園，傷者早日康復！

Le Creuset Family Sales-2011

琴晚睇咗一個 blog友嘅 blog 先知開倉，今朝嗱嗱臨約埋 Eva 去，今次唔洗好似上次O甘排成幾個鐘隊，開倉地方又近咗，喺尖沙咀。

十一點幾去到，人唔算太多，可以慢慢選擇，不過款式無上次O甘多，又無嘜大 size 嘅煲，不過今次我 target 細煲 only。

我地行咗個幾鐘，已經行完比埋錢喇！我終於買咗個細煲，加埋一個焗盆。

我個心頭好呀！20cm 粉紅色，勁靚！

紫色焗盆，都好靚！

今次買嘅全部係一直想買，無買到啲多餘嘢！

我擁有嘅 Le Creuset，一大一細煲，應該夠用喇！

才藝義演為公益-2011

年年家姐都參加學校嘅才藝義演為公益，只要捐出一佰元，就可以上台表演，家姐幾年都表演彈琴，而妹妹就唔太喜愛上台表演，只是曾經和家姐一起表演過唱歌，今年就特別啲，兩姊妹加埋家姐幾個同學，一齊表演話劇。

表演片段

http://www.youtube.com/watch?v=sKFb7vjzo2g

對妹妹來說，今次算係突破，負責做旁白，全場最多對白要講。

家姐就做公主

 

 

開戰

其實仲有幾篇 blog 等住出，不過好想寫呢篇先。琴晚，又同兩姊妹開戰，踏入三月，已經不斷叫家姐安排吓啲時間温書，準備三月尾最後一次呈分試，可惜三月頭，佢又真係好忙，學校管樂團今個星期要比賽，成日放學要留校練習，上星期六又要返學校表演，星期日又開生日會，琴晚終於話做唔哂補習姐姐嘅工課，叫我同姐姐講叫佢下次比少啲，我唔肯，我話姐姐上星期二比佢，有成個星期比佢做，佢上個星期忙，但唔可以用 嚟做藉口，佢應該自己學吓時間管理，偷啲時間做囉，星期五、六夜晚放棄睇一個鐘電視，就可以完成，我唔肯，佢就發爛，我一講我嘅理由，佢就話我閙佢，正當呢個時候，阿妹又喺度嘈，話我同家姐閙，而唔理佢同佢默書，佢要趕住瞓因為佢病，佢不斷嘈，我就比佢攪到發瘋，又同佢大戰一場，我覺得好累好累，兩姊妹令我精神應接不到，我EQ  O甘低，其實真係唔應該生兩個，不過生咗出嚟，就要對佢地負責任。

我明白佢地讀書好辛苦，尤其是家姐今年六年級，佢自己都知今次考試嘅重要性，但自己又唔肯付出，我想幫都幫唔到架！

琴晚我心情很差，我成日都話，做屋企嘢有幾辛苦啫，對住兩姊妹先最頭痛，不過琴晚收到朋友一個消息，又覺得人生無常，唯有凡事睇開啲！今朝個頭好痛，我就出咗去行咗一陣，放鬆吓啦！

家長義工 - 6B班

呢幾年都有做家長義工，負責幫老師一齊去外面做教育性参觀，前兩次都係帶妹妹嗰班，今年家姐六年級，佢話想我帶佢嗰班喎！今年除了做教育性参觀嘅家長義工 ，仲去了校運會幫手，既然家姐今年喺小學嘅最後一年，佢希望我做多啲，都無所喂啦！

雖然只係一間小學嘅運動會，但佢地都好認真架，有開幕式！妹妹有分表演，不過，太遠影得唔太清楚。

話就話做義工家長，喺校運會負責家姐嗰班(6B)嘅啦啦隊司令，但實情佢地O甘大個，個個自己都準備得好好，全部自動自覺。

我都無嘢可做，唯有週圍影吓相啦！

家姐啲 friends

妹妹嘅好朋友。

臨尾來過大合跑。

上星期三，又幫手帶6B去粉嶺嘅環境資源中心参觀。

6B大合照

其實做吓呢啲O甘嘅義工，都幾好架！既可以和阿女啲同學熟啲，又可以了解阿女喺學校嘅程況多啲添！