2013 大計

踏入一月，好想做好多事，但日日都好似好忙，家姐考試日日早放，阿妹雖然唔洗考試，但因其他班級考試，也提早放學，佢地鍾意住家午餐，所以又要煮又要洗，都冇咗好多時間，本來想執下兩姊妹間房，之前買了個新櫃，都未執好啲雜物，啲嘢仲亂放一堆，日日都想做，但日日忙下東，忙下西，又冇咗日，唉！都唔知幾時先攪掂！下個月過農曆年，又係時候同間屋大掃除，而家要自己做，所以會分開來做，費事做死自己！
 
加上一月，又係升中自行交表既時間，雖然只係填下表，整理文件，但又是一件略花時間既事情，好在今天的起心肝，攪掂唒！過幾日，去交埋表就告一段落！

講咗咁多短期大計，想諗下長遠些既計劃，九月阿妹升埋上中學後，我就更加得閒，起碼每天唔洗三點即露，趕返來接放學，所以到時，或許想學多些嘢，雖然或許應該，我唔會再選擇出來做番老本行，但都想學番一門技能，或許遲些可以𨍭型呢！

今年繼續想煮多些學多些，希望煮多些滿意既作品！