2011年回顧

又係年尾嘅時候，回顧2011 呢一年，可說是過得極快嘅一年！今年，經歷了幾個轉變，可幸是一切都能順利通過。 先說今年開始沒有用工人姐姐，坦白講，十分適應，少咗個外人嚮度住，真係 feel 好多，又慳了錢，又唔洗揍多個人，當然好感恩，仍有公公、婆婆嘅幫忙，所以還不算吃力！呢一年，令我尋回失去很久嘅一個人時間，我實在好響受一個人在家嘅寧靜和自由！

今年最重要和最難忘的，當然是家姐升中派位和升中後的轉變，幸好最後都一一應付得到。

最開心當然是暑假嘅五天沙巴之旅。早於一年前，已計劃今年暑假，待大女升中放榜後，無論結果怎樣，都要去一次外遊放鬆吓心情。很高興有兩個好朋友，都想帶子女在暑假外遊，因此，我們一拍即合，約定了一齊成行。其實，數數手指已經五、六年沒有一家四口一齊撘飛機外遊，而且今次一行十人，實在難得！五日旅程，五個小朋友玩到傻，上天下海玩到盡！
 
而最值得安慰是，食了四年嘅藥，終於可以停了，雖然思想上需要日子去適應和調節，但亦總算捱過了！ 好快又踏入2012 年，如果真係有世界未日，來年就係最後一年，當然要好好珍惜每一日，每天都要過得快快樂樂！

三文魚凍肉批

之前喺 Rachel Yau 嗰度學了呢個 party food , 聖誕期間做了！


材料：
煙三文魚 500克
檸檬汁1個份量
羅肋葉15 片
水牛芝士（瑪蘇里拉） 白色
火箭菜

調味： 海鹽及黑椒適量

做法：
1 將檸檬汁灑在三文魚片上
2 以保鮮紙覆蓋批模，鋪上三文魚片
3 洒上黑椒海鹽，鋪上水牛芝士，然後再鋪上羅肋葉，之後再鋪上三文魚片，如此類推。
4 以保鮮紙封好，以重物壓著，放入雪櫃冷藏一天
5 將三文魚批切片，伴以火箭菜進食。

平安夜晚餐 - 2011

一早 plan 了今年平安夜在家自家整晚餐，後來查生有 pair 朋友話上來食飯，所以更加認真準備。

Menu :   頭盤： 菜沙律湯： 金必多湯
   主菜：蟹肉焗磨菇   芥茉籽燒雞 意大利飯

個金必多湯係跟馮美基個節目學，佢話呢個湯係聖誕湯，見又唔係難做，就試整，不過，煮忌廉湯始中要耐性和時間，所以呢餐飯要下午就開始準備！ 而個燒雞係跟大少奶本書整，我覺得好應節，可以代替火雞呢！ 磨菇同意大利飯，就唔記得影相喇！

迎聖誕

繼上星期嘅一輪飲飲食食，今個星期開始準備過聖誕。由細到大，我都鍾意農曆新年，多過聖誕節，但近呢兩年，我似乎喜愛聖誕多啲，以前覺得年尾準備農曆新年，條街出面人來人往，啲氣氛好好，但近呢十年，香港人越來越重視聖誕節，週圍都整得好靚，而家啲人又多了買聖誕禮物，好有氣氛！加上呢兩年開始學煮西餐，聖誕節好似有份動力，令我去煮嘢食，加上我地咁鍾意在家攪派對，可以比個機會我滿足吓，所以呢幾日，都會忙住諗 Menu ，買材料，仲要出去選禮物，比小朋友，所以好多外出嘅時間呢！haha ！

飲飲食食的一週

上星期過了一個飲飲食食的一週。

12月14日 （星期三）帶查生去咗5 R 食晚餐，的確是水準之作，不過因為是私房菜嘅關係，廚師得一個，要整十幾人餐，實在需要時間，一餐食了近三個鐘，不過，的食物味道真係好好，感覺到廚師好有 heart ，但晚餐比較貴$500 一位，我覺得食 lunch 抵好多，$150 位，我估下次都係去食 lunch ！

12月15日（星期四） Blog 友仔正日生日，剛巧有空跟我們（我和Amy)食 lunch , Blog 友仔選了 Hugo。雖然我地唔係成日見，但每次見面都很開心呢

12月16日（星期五） Eva 幫我喺 Rachel Yau 度買了蟹肉，約了我在 Pizza Expree 食 lunch 取貨，今次去海港城嗰間，望海架！不失為一個食 lunch 嘅好地方！ 呢個星期真係食了很多好嘢啊！

忽冷忽熱

天文台一早預告今年嘅冬天會特別冷，但實情又好像不似，上星期凍過一次十二、三度，之後又回升到廿幾度，今天仲有成廿五度，咁樣忽冷忽熱，真係好易病。我就最唔鍾意啲天氣咁，我鍾意一係好凍，一係好熱，一係冷冰冰，要不然就熱棘棘，唔要中間，我份人真係好怕啲嘢唔湯唔水，好似而家咁，我估作病，但又係唔上唔落，未發出來，但又知就來嗰種感覺就最差，記得鄭秀文喺佢本書講過，佢連病都要病得切切抵抵，要病就激烈地病一場，然後又切抵地好番，我同佢就係呢種人，樣樣事都要清清楚楚，乾乾脆脆，咁樣做人是否會辛苦啲呢？

半日 hea @ 尖沙咀

踏入十二月，又可以開始去玩多啲，上星期五好友放假，相約了去 Yamm 食 lunch buffet ，呢度唔算多嘢食，但勝在啲食物水準唔錯，加上環境好，坐得舒服，啱哂來 Hea 。

食完 lunch 就喺尖沙咀週圍逛逛， shopping ，行到累就梗係坐吓 tea 吓，再繼續，嗰日仲影了很多相，一到十二月，週圍都布置得好靚，好有聖誕氣氛！就係咁行吓，影吓，又 Hea 了半天！

那些年，我在家裡的日子

一直都想寫一篇 blog，關於呢四年無返工在家過嘅日子，希望第時睇番，都記得呢幾年做過什麼。
 
四年唔算一段短嘅日子，但係就比我想像中過得快，頭三年，兩姊妹年紀少，除了跟她們功課外，出出入入課外活動，管接管送，已夠忙碌一整天，所以十分充實，直至上年，家姐升上小六，開始要求獨立，慢慢我也放手比她自己返課外活動，我只要顧住妹妹一個，就輕鬆多了！ 不過，呢一年冇用工人姐姐，多了家務要做，正好又填滿我每天嘅生活。

現在我每天的時間表大致是這樣：

星期一至五

6：15 起床，叫兩姊妹起身，煲水，洗杯等
6：45 送妹妹落樓下撘校車
6：50 再送家姊落樓下撘保母車
7：00 通常沒什麼特別事要做，就會再瞓番
9：30 再起床，之後嘅時間，多數是做淸潔，跟住可能去做瑜珈，出去做些私人事，或約人食 lunch等，如果留在家，就上網或睇電視 ，整午餐給自己
2：30 通常會返到屋企，做一些家務或上吓網，睇吓電視
3：15 落街接妹妹放學，家姐升中後自己放學回家
3：30 妹妹回來會食啲嘢，之後叫佢沖涼
4：30 帶妹妹去補習社或公民數後，呢段時間會收衫和摺衫，跟住又有 feel time ，可以上網或睇書
7：00 食晚飯
7：30 洗碗，清潔廚房
8：30 同妹妹溫書，基本上她會在補習社做哂所有功課和溫習，咁我就會去沖涼，佢就打機，家姐自己做功課和溫習
9：00 開機洗衫
9：30 叫妹妹去瞓，不過自從家姐升上中一，通常未做完功課，所以妹妹都會遲啲瞓，通常佢會睇吓書，而我都會一齊睇書陪佢
10：00 妹妹瞓，而家姐通常十點半先瞓
10：30 我可以睇電視或上網 基本上我會等查生回來先瞓，他通常十一點幾回來，如果佢出差，我就會早啲瞓。

基本上，呢幾年嘅生活都係咁，只係以前有工人姐姐，唔洗做家務和早起外，私人時間就多啲，可以任意出街，而呢一年就真係少咗了，始終冇咗工人姐姐，都會有些不便，而家去街盡量早上去，下午三點前回家接妹妹放學，幸好還有公公、婆婆幫手，有時真係返唔切，都有佢地帮手，加上婆婆幫手買餸、煑飯，我真係舒服好多，＋分感謝他們嘅幫手，真的要感恩啊！

除了日常生活外，兩姊妹測驗、考試期間，我就會很忙，要準備試題幫佢地温習，佢地放長假、暑假，又會帶佢地出街，参加課外活動等等。其實，看似平凡嘅日子，但其實對我意義很大，以前返工，放工回家對住兩姊妹嘅時間很少，就算星期六、日，又會有很多平時做不到嘅事情，迫在這些日子中進行，所以在家時間不多，而無返工呢幾年，天天在家，對家那份感覺實在很多，其實一頭家，係有好多好濕碎嘅事要辦，全職媽媽時間多了，就會做得比較好！

我好慶幸當天選擇回家，這些日子是值得投放在女兒身上，而且對我自己，都很有得着！

懶惰

開學到而家，差不多三個月了，人總是懶懶的，日子一天天過去，每天沒做什麼似的！這些日子裡，看似很忙，幫99 整櫃，家裡裝修，但個人本身是懶懶的，無論去玩、做家務，都不太投入，但經我努力的自我調教後，終於呢幾天開始好轉，可能就快踏入十二月，我喜愛嘅聖誕和農曆新年又到，心情有所改善，又有動力去繼續我嘅享受人生目標！

其實自 Yblog 轉新後，我寫少了很多，我諗係時候要努力 update 多啲，而家可以用 iPhone 寫 blog ，的確方便很多了！

查家有女初長成

以前我覺得小朋友細過時，係最難攪，嬰孩時好困身，都小學時，又要為功課勞心勞力，但原來升上中學，開始踏入青少年期，先係最難處理嘅階段，處理得唔好，可能會影響好深遠！ 家姐升咗上中學，只係短短兩個幾月，但就已經有一定嘅改變。其實，每個人都年青過，佢面對緊嘅轉變，我自己都試過，只係當自己嘅角色係媽媽時，又會有點醋手不及，需要時間調節。可能因為自己年輕時，有過一些經歷，諗嘅嘢會多咗，反而影響了一些對家姐嘅看法，喺呢方面，我仍在摸索中，希望早日取得平衡！

大嘅很多事要放手，細嘅亦在不知不覺中長大，成日以為妹妹仲係好 B B，原來如今十歲小孩，已經開始反叛，比家姐嗰時更早！唔知是否拉女拉心肝，由細到大，我對阿妹都係放任啲，無對家姐咁嚴緊，所以妹妹比較霸道，唉！所以，我更加擔心妹妹升中後，會更加難攪！
 
朋友以為我啲女長大了，就羨慕我可以甩身，但其實而家呢個階段，才是最惱人呢！

吞拿魚三文治

一直都好鍾意食吞拿魚三文治，但次次自己整，都整唔到出面嘅味道。琴晚，朋友教了我一個方法，嘩！真係好似出面食嗰啲咁香。

吞拿魚醬：

材料：吞拿魚一（水浸）
橄欖油少許
奇妙醬少許
Wasabi 少許


做法：

1  將吞拿魚格水，加橄欖油攪勻，之後加奇妙醬再攪勻
2 最後加 Wasabi ，份量要慢慢調教，加了 Wasabi 會香好多，個味就會似出面嗰啲。 我今日已經急不及待試整，真係好味，成功了！

四年的全職媽媽生涯

不經不覺又過了四年，頭三年真係過着少奶奶的生活，有工人姐姐幫手做家務，只要全職照顧兩姊妹的成績就可以，到了今年，才正式當起一個全職主婦，可幸的是，兩姊妹已經長大，家姐升上中一後，已經有很多事情我理不到，現在只有全心全意照顧着妹妹嘅成績就可以。
四年時間不短，但看着兩姊妹成長，又好像很快！從沒有後悔當年嘅決定，更加覺得當年嘅決定是十分正確，呢四年時間，比咗我一個好好嘅反思時間，慢慢感受人生嘅生活意思！

那些年，我們一起追的女孩

近排有股「那些年」風，所有人都在講呢套戲： 「那些年，我們一起追的女孩」，讚到天上有地下冇，甚至係人生中十大要看嘅戲之一。終於琴晚我睇咗，無可否認的確係一套好戲，拍得好細緻，最重要係可以勾起不少人學生時期嘅回憶，令觀眾有共嗚感，那段錯過了嘅愛情，嗰份遣憾，最令人難忘，其實，只不過係一個簡單嘅故事，可能每個人學生時代都經歷過，觀眾睇了就會代入了自己以往嘅故事裡，所以咁多人覺得好睇！加上呢套片係真人真事，女主角雖然喜歡男主角，但嫌棄他太幼稚，而沒有選擇和他繼續，是很多女仔曾經遇過嘅經歷，我想就算他們當時走在一起，最終都是會分開的，正如女主角所言，她沒有大部份人想像得那麼好，叫男主角想清楚才喜歡她，如果真的走在一起，很多現實問題，就會破壞這段清純嘅愛情，就是沒有一起那種遣憾，才令到人覺得難忘！ 不過，我覺得出面嘅評價有啲誇大了，其實近似這些片以往都有，只是天、時、地利而紅了呢套出來吧！

一年一度嘅大閘蟹 gathering

星期六又係一年一度嘅大閘蟹 gathering! 是次亦都是慶祝我地成班相識十七週年，開開心心，又過一晚。

自家製豬肉干，作餐前小吃。

多謝大家嘅手信！

天使就在你身邊

停咗藥差唔多兩個月，心情仍在適應中，為免成日胡思亂想，呢兩個月來，一有時間我就睇書，無論是小說、漫畫，還是哲理書籍，一本接一本。買呢本書係因為有一次睇電視，睇到佢一個訪問，佢唔係明星明人，佢只係一個大律師，一生受盡苦難，最近出了本勵志書，我對佢最大嘅興趣，係佢姓查，所以我就想買佢本書，一次喺書局，無意中又比我搵到，便買了回來，呀！世事又真係巧合，原來佢係張小嫻個表哥，你知啦，我係張小嫻嘅 fans ，估唔到佢媽咪姓查喎！

講番本書，其實一般，唔係十分出色，只係一本普通嘅勵志書，不過，有一篇特別想講，係關於天使，呢篇係講，每個人身邊都有佢嘅天使，經常喺我地身邊出現，喺適當嘅時候，出現來幫助我們，不過佢自已又唔知道，原來自己做了人家嘅天使。我點解對呢篇咁共嗚呢，係因為兩年幾前，我雖然食住藥，但情緒都係一直反覆，有段時間好辛苦，好想搵出路，但我又唔想同朋友分享我當時嘅感受，一次中學同學聚會，晚飯期間，都係普通傾談近況，直至回家途中，因有位朋友是同我同路去葵芳，佢亦都係情緒病嘅過來人，就喺臨走時，先問起我嘅情況，我地就企喺地鐵站傾了成半個鐘，佢分享了自己停藥後一年，情況都反覆，成日想返去睇醫生，食番藥，但最後佢無，佢家姐叫佢返教會信教，不斷幫佢祈禱，結果佢真係舒服了，其實當時我也想過信主，可是我自己又覺得，因為自己有病先信，好似唔係幾好，內心是爭扎着，但聽完她講佢嘅親身經歷，又好似明確了很多，佢話其實佢都唔係太鍾意返教會，佢話自己祈禱都可以，於是當晚我開始了祈禱，最神績是，我住喺一間教會樓上多年，我都沒有真正去望門上寫了： 神是我們的避難所，是我們的力量，是我們在患難中隨時的幫助。我突然'叮'一聲，之後開始我晚晚瞓前都會祈禱，有時有憂慮都會祈禱，自此以後，我嘅情況真係好了，可以減藥到停藥，我信神為我們安排了一切，憂慮就減少了，雖然仍未完全成功，但我仍會繼續努力！我想講呢位中學同學，就是當時神派來嘅天使，來救我的，我相信連她自己也不知道，成了幫我嘅天使，好感謝佢！

文中講，當你樂意成為別人的天使，日後他人也必然會成為你的天使。天使不一定在天上，人間到處一樣有天使存在，只要你願意付出和承擔，你就能成為人間的天使。

中一生活

開咗學差唔多兩個月，家姐成為中一生後，生活真是多知多釆，雖然沒有參加好多學會，但總有好多課後活動，一科中史已經有幾個 project, 又有中史播音劇要做，成日要去同學仔屋企做，又有一大堆分享會，水運會，運動會 ……生活十分充實，而功課亦都唔少，默書小測暫時仍未掌握到温習方法，所以成績唔多好，佢已經唔比我幫佢，呢啲年齢係唔鍾意我理佢咁多，只可從旁協助。不過， overall 佢好似好鍾意中一嘅生活，讀得好開心！

而我覺得佢升上中一後，好似大個咗好多咁！

 

第一次用 iPhone 寫 blog

終有一樣嘢，係新 blog 好個舊 blog ，就係用 iPhone 寫 blog和留言，以後就行去邊，可以寫到邊，其實 upgrade 咗後，自己都少了寫 blog ，覺得佢岀相，好麻煩，有時啲相要upload 好多次先得，出相又亂哂，攪到無 mood 寫，以後都係會用文字多過用相喇！

覆診 Update - Oct 13, 2010

今晚又覆診喇！來來去去都係果啲說話，其實而家覆診都唔係同佢傾心事，只係定期去攞藥姐！

自從上次病後，情緒因食了藥而差了，雖然病好停藥後，情緒已回復穩定，但心情仍有點波動，直至睇完大少奶送給我那本書後，才有所好轉。

*人生的順逆，常在一念之間，只要肯放手，豈不是峰迴路轉，柳暗花明又一村嗎？*

*上帝要我們做事要憑愛心而做，當我們付出愛心，上帝對我們的獎勵就是加倍的賜福，你願意給出去多少，上帝就願意給你多少*

*我們用什麼量器量給人，上帝就用什麼量器量給我們*

5 R

終於試到大少奶近期推介嘅私房菜，第一次去當然由大少奶帶我地 ( Amy 同我) ，好開心我地三個已成為一組了。期待今次嘅約會好耐喇，雖然唔係特別有什麼嘢傾，但係東講西講，就吃了一個愉快嘅午餐。好多謝 Amy 比了一些建議我，如何同家姐相處(因 Amy 個女都係升中一) ，大家互相分享一些作為中一家長嘅心聲，希望大少奶唔好覺得悶啦！

 

講番呢間私房菜，真係OK, 只係由兩夫婦經營，大廚係老公，樓面就係老婆，只係幾張枱，一次只係可容立十幾人，雖然係私房菜，但啲食物唔馬夫，有水準，尤其之後參觀完佢個廚房，佢用嘅都係我地一般家用嘅工具，所以我覺得佢好勁！

間餐廳叫 5 R，其實係代表佢五個仔女，係！係五個：大的中一、二年班、K3 、兩歲和十個月大，好有勇氣，我生兩個都死死吓！老板娘好 nice, 同我地分享了五個細路嘅點滴，真係十分極度偑服佢地，唔知仲會唔會有 6 R …… ?

 

大埔小白鷺餐廳

重陽節假期，去了大埔小白鷺餐廳玩了個下午。好耐無試過一家四口去郊外走走，趁爸爸呢幾日有車揸，就選了嚟呢度。

 

先食個 lunch, 再週圍走走，

餵吓羊仔，玩吓船仔，因 book 了BBQ, 但又未夠鐘，先去公園坐吓，玩吓波。

出外玩了半天，外出走走，心情都舒暢些！

公公七十大壽飯@大榮華-2011

琴晚，喺大榮華 book了一圍，約埋姨婆、表姨媽，表舅父同公公慶祝生日，其實，以前幾個長輩生日，都會幾家人一齊食飯，所以一年總有幾次固定飯局，但唔記得從何時，這些飯局停了，親戚來住一年就只有一、兩次。

近呢年，我和表姨媽一家好像多了聯絡，亦因為而家最 close嘅親戚亦只有呢家，所以都盡量攪多啲聚會，見多啲！

今年適逢公公七十歲，就約埋食飯開心吓！

 

來緊農曆新年，我地 plan咗來一次家族旅行，一齊去韓國，好期待啊！

四年

寫 blog寫了四年喇！當初開 blog係想寫底我由一個在職媽媽，變成全職媽媽嘅點滴，記底和兩姊妹一起度過快樂時光，後來，發現在這裡記底了很多一大班朋友聚會嘅分享，有時睇番都好開心！

 

不過，近來很多 blog 友，都想轉走，或者唔再繼續寫 blog，因為 Yblog upgrade 後，新Yblog 好煩，好難用，而且無了人氣榜，對一啲人氣 blogger，係有影響，我唔係人氣 blog, 無太多留言和 blog 友，所以無咁多負擔，去邊都無所謂。雖然也有一刻想停寫，但最後我都決定繼續 ，只係可能會轉去第二度寫。

 

寫 blog呢幾年，除了留底了很多回憶外，還認識了一些 blog友，雖然唔係全部都見過面 (除了大少奶和 Amy, 真係見過面和做了朋友, 這是我寫 blog意外得着) ，其他 blog友無見過面，但睇佢地啲 blog update, 就好似識咗佢地咁，有時大家交流吓，有時又大家支持吓！係一種另類嘅友誼。

 

我會繼續寫下去，不過就想揾過穩定啲嘅平台，唔係點 keep啲日誌，keep到兩姊妹大呀！

Le Creuset 2011 開倉-戰利品

原先今年唔諗住去，但上個月喺 Rachel 度學了味三文魚卷，覺得用呢個整會整得好啲，於是又心思思想去，約了鐵腳 Eva 一齊去。

 

有了上年嘅經驗，今次星期一先去，以為唔洗排隊，點知都要排幾個字先入到去，不過比上年好好多，個幾鐘已攪掂哂！

 

今次好有定力，無亂買嘢，extra 買了四個焗湯碗，–家四口，一人一隻。買了後，好想整白湯。

心心杯買給朋友當生日禮物。

所有戰利品來個大合照！

 

停藥

呢篇 blog 想寫了很耐，但一路都提不起勁，新嘅YBlog 令我唔太想寫！

踏入九月，除了係家姐升中嘅轉變，同時亦都係我停藥嘅時候，食了差不多四年藥，一吓子唔食，係要相當嘅勇氣，不過，既然醫生都比，無理由成世依賴藥物，停咗個幾星期，仍在適應中，一位曾有相同問題嘅朋友，一早同我講，停藥初期，係會唔慣，成日囉囉攣，係要靠自己意志去過，我會努力的！

暑期活動回顧-2011

琴日又係一年一度嘅開學日，個半月嘅暑假又過去了！回顧今年嘅暑假都係忙、忙、忙，忙放榜，忙叩門，忙返暑期班，忙去旅行，忙吃，喝、玩、樂，由於 Yblog upgrade 了，寫 blog post 相係勁複雜，攪到都無心機寫 blog, 其實，諗過唔寫，但喺 facebook 寫，又 keep 唔耐，但又真係想 keep 住兩姊妹嘅成長日誌，唯有繼續，但就會 post 少啲相。

2011 嘅暑假，去過 Ocean Park, 書展，去咗沙巴五天，幾個 gathering ，兩姊妹學了日文和黏士，加上日日都有打機和睇電視，兩姊妹開心到暈！

沙巴之旅-2011 - Day 5

好快又到了最後一日，我地撘早上 11:30 機，所以食完早餐就去機場，五日四夜之旅又結束喇！