Duck Duck

妹妹恨了影鴨好耐，琴日終於還佢心願去了！

真係好多人，又熱！

不過見到隻巨鴨，真係幾開心！

黑色暴雨

琴晚原來落好大雨，家姐話成晚又閃電又行雷，成晩嘈到瞓唔到，我就聽唔到喇！只是六點起身，見下雨，就開手機，就知道黑暴，唔洗返學！後來睇新聞至知，琴晚落得咁勁，好多地方水浸，真慘！

今天突然多了一天黑色暴雨假期，學生哥就全日停課，打工仔既就冇咁好彩，十點就取消了黑暴，大家又要趕返工去也，落大雨,水浸又塞車，返工既仲慘過平日。 對於我呢啲全職媽媽，唔洗返學，梗係三母女瞓晏啲啦！

不過小姐唔洗返學，就要預備午餐比佢地，平時一個人，簡單食咩都得，落雨又唔想出街食，見屋企有包韓色年糕，就學琴日肥媽教，煮韓色年糕，加豬頸肉炒，都幾好味！

 
阿妹唔洗返學，就不斷叫悶，到暑假時都唔知點算！

其實，由三月中開始，就斷斷續續落雨，落了差不多兩個月，落到心都煩！希望快些見到陽光啦！

豬肉蝦多士

上星馬班學了整蝦多士，星期日朋友囡囡生日會，情邀我整一次，可惜唔記得影相，唯有用番上堂張相啦！

 
材料：

中蝦 8隻，洗淨，介蝴蝶，落少許鹽、胡椒粉、生粉，撈勻醃
豬肉碎4 兩、蒜頭2 瓣、芫荽根2棵、薑1片、蛋1 隻、方包4片，麵粉、麵包康

做法：

1 蒜頭、芫荽根、薑切碎
2 豬肉碎落：蒜茸、芫荽根、薑茸、美極、胡椒粉、糖，撈勻，落生粉，攪至起膠
3 方包切方塊，釀入豬肉碎，上麵粉、蛋液、麵包康，再上少許蛋液放蝦在包上，滾油炸熟。

炸完即食真係好好味，不過都幾熱氣，開派對一人一件就最好！

夏日清新健康派對

佛旦假期，屋企又開派對。有別於以前開既派對，今次好不同，今次以蔬菜為主，一來配合其中一個朋友既減肥大計，二來呢排天氣悶熱，想食啲清新既食物。

是日餐單：
自製蔬菜棒
涼拌雪耳拼醃青瓜
意式油醋三色椒
泰式牛肉沙律
蘋果吞拿魚沙律
南瓜湯
煙燻素鵝
冷烏冬
蟹腳

 
除了蟹腳係外買回來，其餘都係自己整，原來煮蔬菜都好需時，好多嘢要切啊！ 真係幾清，未試過咁清招呼客人，不過，大家都話好滿意，而且又健康！

青春期

做了十幾年媽媽，我覺得最辛苦就係面對子女既青春期，子女在孩童時，揍佢地既辛苦，只是體力精神既問題，但到了青春期，辛苦既就是管教上既問題，一旦出錯，就影響佢地一生，幾大壓力呀！
 
家有兩名女兒，一個十四歲，一個十一歲，兩個都正值青春期，真係令我十分頭痛！

其實，家姐早於幾年前已進入這階段，佢本身思想比較成熟，好細個已經好有主見，所以佢既青春期，開頭一年，不是很明顯，後來升上中一，就真係見到佢既改變，少女不外乎愛美，很注重外表，我自己都經歷過，好明白，而我更加明白，這時候既青年人，不喜愛人管，雖然明白，但到自己時，又好難做到，唔通真係咩都唔管，唔理佢咩，但一出聲，佢又不高興，所以呢幾年，我和家姐都時常吵嘴，幸好，我是全職媽媽，很多時間在家，有時間觀察和慢慢了解佢，關係不至於太差！升上中二呢年，我覺得家姐既情緒穩定咗，當然仍有青春期既特質，但至少感覺良好些，又或者是我經過幾年時間，化了，我容忍了吧！
 
但問題又到妹妹，一直我當妹妹是 bb , haha ! 可能家姐由細到大都冇咩童真，佢似我朋友多過係我個女，而妹妹比較單純，所以一向我緊張照顧佢多些！但而家連佢都開始反叛，以前冇咩主見，現在就叫佢行東，佢就行西，又古古惑惑，好多秘密，唉！我接受唔到呀！以前好bb 個妹妹去了邊呀？我估好多父母同我一樣，接受唔到仔女咁快就長大，去到青春期，我有幾個朋友情況，和我一樣呀，煩惱中！

做父母其實冇咩可以做，經驗話我知，唯有忍，冇錯係忍，盡量唔好同佢地正面衝突，咁做關係先唔會變差，又要求其所好，同佢地有共同話題，好在我兩個都係女，佢地鍾意食甜品，我就經常帶佢地食，佢地貪靚，我就同佢地一齊上網買衫，咁先得到佢地信任，會比機會了解到佢地，但就預咗要花好長時間，去同佢地一齊渡過，不是二時三刻就解決到！

我聽人講，面對仔女青春期，唯一可做是接受、面對，我仲努力緊！

燒豬頸肉

呢個豬頸肉，整了幾次，試過醃了去 BBQ , 或當餸食都好好味！

食譜 from 大少奶
 
材料：

豬頸肉 2~3件

醃料

檸檬葉 半杯

乾蔥碎 半杯

芫茜碎 半杯

老抽 50ml

魚露 5湯匙

米酒 1/4杯

砂糖 7湯匙

蜜糖少許（原本食譜有麥芽糖，因為屋企冇，唔想買，改了用蜜糖，都可以）

做法:

焗爐預熱230度

1  將豬頸肉洗淨抹乾，將醃料拌勻放入豬頸肉醃過夜

2 醃好豬頸肉放入焗爐，將兩面燒熟15 ~20分鐘，再塗上蜜糖，焗大約5~10分鐘燒至焦香

3 放上架放涼，切件上碟



另外可配一個汁食，這樣就變成了泰式豬頸肉，但我試過有次冇整汁，都好味，所以有兩種食法！


汁做法：

青檸汁或白醋 5湯匙

魚露 2茶匙

砂糖 2湯匙

蒜蓉 半茶匙

乾蔥頭兩粒切片

將所有材料拌勻即成汁醬

母親節的意義

琴日又是一年一度既母親節，今年如往年一樣，在家煮海鮮大餐，每逢大時大節，出去食都係又貴又不好吃！
 
原來想叫查生和兩個女煮這餐飯，比我和婆婆食，不過，後來發覺都係要從旁協助，如果唔係，十點都未有得食！
 
我前一晚醃了豬頸肉，而琴日下午再和查生去買些海鮮，我們買了龍蝦、象拔螃、星班和大蝦，都唔平架，五佰幾，不過學肥媽話，食平啲，唔等如食 cheap 啲嘛！嘩！如果出去食，六個人實過仟啦！啲料仲冇咁靚！

 
記得細過時，母親節其實唔係咁流行，知道有這個節日，但就如兒童節、萬勝節等，冇咩特別，做子女既最多和父母飲下茶慶祝下！
 
但近十年，坊間每年一踏入五月，週圍商場、電視、電台，總會大量宣傳，攪很多活動，推出很多商品，和母親節有關，吸引仔女消費，其實，我呢幾年，越來越發覺母親節，好像失去了當初真正既意義，發起這個節日，是希望人們每年既呢一日，對母親平日所付出既，做子女要好好感恩和感謝，但時至今日，母親節像變成商家利用既好時機，推出什麼母親節套餐，平時 $499 ，到了那天可能加到$999，食物質素仲要下降，因太多客人了，又巧立名目，不斷宣傳子女要送名貴禮物給母親，總之將母親節，成為一個消費好時機！
 
其實，我個人不是反對慶母親節，但就覺得唔需大費週張，豪食一餐，或送名貴禮物，我覺得如果係孝順的，天天都是母親節，平時也可帶母親出去食好嘢，唔洗一定是嗰日架！又如果做仔女既，一年只有呢日先陪母親吃飯，咁有咩意義！有些仔女花好多錢買名貴禮物給媽媽，但平日一年到晩，都話忙而冇咩見面，你估做媽媽既，會開心嗎？她們真是想要這些嗎？
 
當然，我讚成在這天日子裡，感謝媽媽一年到晚，年年月月，為家庭、為仔女辛勞，一些小小禮物，一枝花、一張咭，一句說話，甚至幫手做家務，做媽媽既已經好開心喇！

最後，希望所有母親，天天都開開心心，健健康康，唔係只有母親節那天才快樂！

肥媽食譜 - 南瓜湯

近排電視晚晚做肥媽既＂食平啲＂，佢教煮既嘢夠實際和易煮，所以好鍾意睇佢做節目，今次節目教人用平價食材，做出高級食譜。 今次教煮既南瓜湯，好易做而且真係平，琴晚整了一煲，成本只是$12

材料： 南瓜切粒（街市買一邊，$8 ）不過，我覺得想甜些，南瓜味重啲，用日本南瓜好些，但就貴好多，起碼二、三十元一包

煙肉三、四片切粒、洋蔥半個切粒、乾蔥頭四粒切粒、牛油和忌廉少許

做法：

1 爆香煙肉、洋蔥和乾蔥頭
2 下南瓜，加水，煮10 分鐘
3 煮醂啲南瓜，熄火加牛油、忌廉，攪勻
4 用攪拌機攪
5 調味，下少許鹽、胡椒粉，再煮一陣即可

做法簡單，但又做到個湯好滑、好 creamy ！

DIY Soft Off Gel

一直以來，都有油腳甲既習慣，所以都有買下甲油，不過由於自己粗手粗腳，油手甲油得唔好，所以都係出去比人整，近幾年，興整soft off gel，㩒得來又唔洗磿甲，唔傷甲，但就唔平，每次都差不多三佰！
 
最近，一位朋友買了部 LED 照燈返屋企，買埋一啲 soft off gel 甲油，話自己 DIY 做，佢話原來唔難，佢做得好靚呀！而且成 set 工具唔貴，值得買。後來，另一個朋友又買了，她們倆整了很多款式，好靚架！ 起初都擔心難整，但朋友借我整過，我都整到，當然冇佢地咁靚，不過我已經好滿足喇！最後，我都買了！ 我再推介比另一班朋友，結果佢地都一人買了一部，而家個個瘋狂，在家玩 gel 甲！

全套 $510 包機，一枝 base , 一枝 top , 再加兩枝甲油，如果另買其他色既甲油，都係 around $38 - $48 ，當然有些貴啲，百幾二百一枝都有，任由自己喜愛選擇。
 
其實，整個過程很簡單，好似揸甲油一樣：
 
1 先揸 base , 要均勻地塗上指甲上，之後照燈

2 揸顏色甲油，逐隻揸，記得執好唒啲邊，攪掂滿意，先好放入機照燈，因一旦未照燈，都未 fix 死隻色，揸得唔好，可抺過再揸，揸到好為止，照了燈，呢一層色，就hold 實，之後，揸第二層，又係執靚，先照燈，通常揸兩至三層就可以！

3 揸好色後，如果要貼貼紙、畫花，就先用棉點些脫甲水，輕抺每隻甲（因照完燈，隻甲會滑滑的），放心啊！照了燈，甲色已 fix , 冇咁易脫色。之後，才貼貼紙或畫花

4 攪掂貼紙等，就在甲面塗上 Top , 再照燈

5 最後，用有脫甲水既棉，再抹每隻甲即成

因為 Soft off gel 照燈後，甲色唔會咁易脫，唔會好似普通甲油，等好耐先乾透，就算做完立即濕水也可，方便過揸普通甲油好多！
 
雖然，我做得麻麻地，還有很多改善空間，但能夠做到，我已好有滿足感，我會繼續努力！

好朋友結婚喇！

認識呢個朋友超過十年，我地初初是同事，但唔同部門，最初唔熟架，後來因為大家都住青衣，放工一齊走，一齊撘車，就開始熟了！ 後來大家先後離開了那公司，大家仍有聯絡，雖然唔係成日見，但又可以成為交心既朋友。

多年來，佢既情路都不是太順利，好多時都需要我和另一位朋友安慰佢！記得幾年前，佢抱怨身邊為何還未出現另一伴，我跟她說，既然你是信主的，神一定會有所安排給你，不要心急，或許很快就有真命天子出現呢！
 
終於，她找到真愛了，上帝為她安排了，當中見證她遇過困難和悲傷，但最後都得以修成正果，結婚去也，所以我是十分、十分登她開心！

有幸前日可以參加佢既婚禮及婚宴，既感動又興奮！

 
送上無限既祝福給她和她的另一伴！

夫妻不再是兩個人，乃是一體的了。所以，上帝配合的，人不可分開。」馬太福音十九章六節

Brunch @ Harlan

今年查生正日生日5月5日，撞正我好朋友結婚，夜晚要去飲，所以同佢食 brunch 慶祝。

想來試呢間 Sunday Brunch 好耐，其實來Harlan 食過幾次 lunch ，感覺幾好，而佢個 brunch除了食 Harlan 西式食物，還可以食埋海賀那邊既日式鐵板燒，都幾多款式食物可選擇！

我覺得呢度既蟹腳和生蠔好新鮮，仲好過上次 Intercon ，我食了好多呢！

之後，仲有海賀那邊既煎鵝肝粒多士都好味，甜品亦唔錯，有馬卡龍，出面一粒都賣廿幾元，我食了一個覺得好味，就再食了好幾個。個南瓜湯都唔錯，不過真係好飽，食唔到好多其他喇！

其實仲有羊架、日式炒飯、鐡柏板燒和牛、三文魚、蝦、刺身、 Pama Ham，還有Risotto 、Pasta 即叫即做等。

 
另包果汁、香濱，可refill ，真係唔錯，雖然貴少少，但包香濱任飲，而且食物質素高，值得一試！

價錢$598 加一，11：30 - 2：30

因為早到了少少，未開始，出了露台影下相，坐呢度都幾舒服呀！

法式油封鴨腿

想學呢款正統法國菜好耐喇！終於喺 Rachel 度學咗。

其實，唔算太複雜，只係要花一些心機！

材料：

鴨腿 : 6 隻
海鹽 : 6 湯匙
百里香： 3 枝
蒜蓉: 6 粒
黑椒: 適量
月桂葉: 5-6 片
鴨油： 1公升

做法：

1. 鴨腿洗淨抺乾，蒜頭切開一半，放在容器內，鴨皮向下，底向面層層疊，將海鹽、黑椒、百里香、香葉等塗勻鴨腿，放入雪櫃，將鴨腿醃12-24小 時。

2. 取出，將鴨腿之鹽及香草以水沖去，以乾拍乾。

3. 在生鐵窩或焗盆，放入鴨腿，傾入鴨油，加蓋蓋好，放入焗爐以120度焗4小時。

4. 焗好，放涼後，將鴨腿取出，將油份隔去雜質，放進密封容器內，注入鴨油，封好，可放於雪櫃保存1個月。

5. 食用時，將鴨腿從雪櫃取出，鴨身軟化後，放入焗爐以250度焗15分鐘即可。

 
食譜 from Rachel ' Kitchen


第一次整:

第二次整:

我前後整了兩次，都尚算成功！

我覺得 這度菜配薯仔和沙律菜就最夾!  用美國焗薯，去皮切粒，用鴨油煎至金黃色。